Ministri i Mbrojtjes në Qeverinë Teknike të Kroacisë, Ante Kotromanoviç, ka deklaruar se zyrtarë serbë që po e dramatizojnë përforcimin e kapaciteteve mbrojtëse të Kroacisë, qëllimet e tyre të vërteta paqësore kanë pasur rastin t’i tregojnë gjatë luftërave të viteve ‘90 dhe për këtë arsye tani s’kanë të drejtë që të mbajnë leksione.
Në një intervistë për revistën Slobodna Bosna, Kotromanoviç ka thënë se ata kanë qenë kampionë të luftës në rajonet e ish- Jugosllavisë transmeton shkrim i HINA-s Koha.net.
“Vuçiç, Nikoliç dhe Daçiç kanë qenë kampionë në udhëheqjen e katër luftërave në ish – Jugosllavi. Ata mund të pengonin humbjen e dhjetëra mijëra jetëve po të kishin pasur politikë paqësore para njëzet vjetësh”, ka thënë Kotromanoviç.
Ai ka theksuar se çdokush ka të drejtë të mbrohet dhe Kroacia, si anëtare e NATO-s dhe BE-së, nuk ka kurrfarë pretendimesh territoriale dhe ka shtuar se dihet se në të kaluarën nga Beogradi divizionet kanë shkruar drejt Kroacisë dhe Bosnjë e Hercegovinës.
“Më vjen mirë që Serbia u zbulua krejtësisht. Ajo mendon se do të hyjë në BE duke bashkëpunuar me Rusinë. Vështirë!”, ka thënë Kotromanoviç. Edhe gjatë luftës në Kosovë, tre të përmendurit nga zyrtari kroat, kanë qenë pjesë e institucioneve të regjimit të Milosheviçit në Serbi.
