Ministri i Jashtëm i Serbisë, Ivica Daçië, thotë se arritja e një zgjidhjeje politike për Kosovën është prioritet kombëtar i Serbisë, ndërsa u bëri thirrje vendeve që e kanë njohur Pavarësinë e saj, ta rishqyrtojnë vendimin e tillë.
Gjatë një konference në Baku të Azerbajxhanit, ai ka deklaruar se Serbia ka përjetuar pasoja nga mosrespektimi i ligjit ndërkombëtar, integritetit territorial dhe sovranitetit.
“Me gjithë veprimet e njëanshme të Prishtinës, Serbia mbetet e angazhuar për të gjetur një zgjidhje kompromisi për çështjen e statusit të Kosovës, që do të sigurojë paqe dhe stabilitet të qëndrueshëm. Ne, në raste të shumta, kemi treguar gatishmëri për të arritur një zgjidhje të tillë”, tha Daçiç.
Ai shprehu mirënjohje për të gjitha shtetet që nuk e njohin pavarësinë e Kosovës dhe tha se në dy vjetët e fundit, “pas argumenteve të Serbisë”, 15 shtete “e kanë tërhequr vendimin për njohjen e Kosovës”.
Në faqen online të Ministrisë së Jashtme të Kosovës figurojnë 116 shtete, të cilat thuhet se e kanë njohur pavarësinë e Kosovës, të shpallur më 17 shkurt 2008.
