Ministri i Brendshëm, Ervin Hoxha, deklaroi të enjten se Policia e Shtetit ka identifikuar dhe proceduar 120 persona të dyshuar për zjarrvënie të qëllimshme ose nga pakujdesia gjatë muajve qershor dhe korrik. Sipas ministrit, 21 prej tyre janë arrestuar.
Në një deklaratë për mediat, Hoxha bëri thirrje për një përgjigje më të ashpër nga ana e prokurorive ndaj këtij fenomeni.
“Mesazhi im u drejtohet prokurorive të rretheve, që këtë vepër penale ta trajtojnë me gjithë përgjegjësinë që u jep ligji, pasi dëmi që këto akte shkaktojnë është i rëndë dhe i pariparueshëm,” tha Hoxha. Ai shtoi se askush nuk do të mbetet pa mbajtur përgjegjësi kur rrezikon jetën, pronën dhe natyrën.
Hoxha paralajmëroi se edhe muaji gusht pritet të jetë i vështirë për shkak të parashikimeve mbi motin, duke kërkuar një vigjilencë dhe reagim të menjëhershëm sapo të shfaqet një vatër zjarri.
Sipas ministrit, pjesa dërrmuese e zjarreve kanë qenë zjarrvënie e qëllimshme dhe shkaktar kryesor mbetet faktori njerëzor. Ai theksoi se vendi është përballur me 59 zjarre të mëdha dhe 961 zjarre të vogla, por falë reagimit të menjëhershëm nuk ka pasur asnjë humbje jete.
Hoxha vlerësoi rolin vendimtar të Policisë së Shtetit në evakuimin e përkohshëm të banorëve dhe në shpëtimin e dhjetëra banesave, duke parandaluar përhapjen e flakëve në infrastrukturën kritike.
Ministri përmendi gjithashtu lëndimin e dy punonjësve të policisë gjatë shuarjes së zjarreve, duke e cilësuar veprimin e tyre “heroik”. Ai përmendi me emër punonjësin e policisë Agim Troci, shef i Komisariatit Delvinë, i cili ndodhet në spital por jashtë rrezikut për jetën. Ndërhyrja e tij dhe e kolegut të tij shpëtoi banorë të bllokuar nga flakët.
