Minë antitank në oborrin e ndërtesës së drejtorit të Institutit të Sigurimeve Shoqërore në Krujë.
Ngjarja e pazakontë është regjistruar në orët e vona të mbrëmjes së të dielës. Alfred Voga, i cili më herët mbante detyrën e drejtorit të ALUIZNI-t dega Krujë, ka konstatuar një pako të dyshimtë sapo është kthyer në banesë, pasi kishte kaluar fundjavën pranë bregdetit.
Lënda plasëse ishte vendosur në portën hyrëse të oborrit të ndërtesës private në fshatin Halil. Me të parë pakon, drejtori Voga ka telefonuar menjëherë Policinë lokale. Forcat e rendit shkuan menjëherë në vendin e ngjarjes dhe bashkë me ta edhe një grup ekspertësh të Repartit të Xhenios, të cilët bënë të mundur çaktivizimin e minës.
“Më datë 11.07.2021, rreth orës 23:25, në fshatin Halil, Fushë-Krujë, në ambientin e jashtëm të banesës, shtetasi A. V. ka konstatuar një pako të vogël ku brenda saj kishte lëndë të dyshuar plasëse. Në vendngjarje shkoi grupi hetimor dhe po punohet për sqarimin dhe dokumentimin e rrethanave të këtij rasti, identifikimin dhe kapjen e autorit”, sqaroi Policia.
Menjëherë pas ngjarjes Policia ka shoqëruar të paktën 10 persona, mes tyre të dyshuar dhe ata që mund të kenë dijeni për kërcënimin me lëndë plasëse të drejtorit të Sigurimeve Shoqërore, Alfred Voga. Mes të shoqëruarve, sipas burimeve, janë edhe persona me precedentë penalë.
Pas konstatimit të lëndës plasëse, i pari që është marrë në pyetje ishte pikërisht Voga, i cili ka treguar dyshimet e tij. Ai ka deklaruar se nuk ka konflikte me askënd dhe se dyshon se ngjarja ka lidhje me detyrën. Kreu i ISSH-së së Krujës ka thënë gjithashtu se ai dhe familja e tij ndihen të kërcënuar. “Sigurisht që familja ime dhe unë ndihemi të kërcënuar. Pakon me tritol e gjeta te dera e shtëpisë. Ky do të thotë një kërcënim i pastër. Nuk di se kush mund ta ketë vendosur pakon te dera e shtëpisë sime, pasi realisht nuk kam ndonjë konflikt të hapur. As familja ime nuk ka konflikte. Mendoj se kërcënimi ka të bëjë me detyrën time të tanishme, por edhe në të shkuarën kur mbaja postin e drejtorit të ALUIZNI-t dega Krujë”, ka deklaruar Voga në Polici. Ai u bërë thirrje autoriteteve që të vijojnë hetimet dhe të kapin autorin apo autorët e ngjarjes.
Një 52-vjeçar ka përfunduar në pranga ndërsa djemtë e tij janë shpallur në kërkim nga Policia e Shijakut, pasi kanë dhunuar me sende të forta një 25-vjeçar, ndërsa kanë qëlluar me armë zjarri duke terrorizuar banorët. Në pranga përfundoi Astrit Keçi, ndërsa u shpallën në kërkim shtetasit Xhulio Keçi dhe Kleart Keçi. “Këta shtetas, në bashkëpunim me njëri-tjetrin, dyshohet se pas një konflikti për motive të dobëta, kanë goditur me mjete të forta shtetasin D. Gj., 25 vjeç, banues në Pjezë, Shijak, Durrës, duke i shkaktuar dëmtime të lehta në trup. Gjithashtu, këta shtetas gjatë largimit nga vendngjarja dyshohet se kanë qëlluar në ajër me armë zjarri në Shijak, duke prishur qetësinë publike”, sqaron Policia. Gjatë ndërhyrjes nga shërbimet e Policisë dhe gjatë shoqërimit të personave që mund të kishin dijeni për ngjarjen e ndodhur, shtetasi Fabian Çalliku ka kundërshtuar me dhunë forcat e Policisë, duke u arrestuar më pas, ndërsa është shpallur në kërkim vëllai i tij binjak, Amadeo Çalliku, 25 vjeç, banues në Shijak, për veprën penale “Kundërshtimi i punonjësit të Policisë”.
Astrit Keçi, i arrestuar nga Policia një ditë më parë, është jo pak i njohur për autoritetet policore. Ai është i njohur si pjesë e bandës “Keçi” e përfshirë në trafikun e drogës, ndërsa më herët OFL-ja i ka dërguar letër për të deklaruar pasurinë. Keçi ishte shpallur në kërkim nga Policia shqiptare në 12 shtator të vitit 2008, pasi Gjykata e Durrësit kishte njohur vendimin e drejtësisë italiane në ngarkim të Keçit. Ai ishte dënuar me 14 vite e 4 muaj burgim, e konvertuar në 10 vite burg. Vendimi u la në fuqi edhe nga Apeli i Durrësit në shtator 2008./m.j
