Kryebashkiaku i Kamzës, Xhelal Mziu deklaron pasuri me vlerë 4.9 milionë lekë, ndërkohë që ka marrë dërgesa bankare prej më shumë se 74 mijë eurosh nga vëllai në Angli dhe kunati në Greqi gjatë viteve të deklarimit.
Xhelal Mziu u zgjodh për herë të parë në krye të Bashkisë së Kamzës në vitin 2007 dhe e drejtoi atë për tre mandate radhazi. Në zgjedhjet e fundit lokale të vitit 2015, Mziu fitoi me 52.94% të votave nën logon e Partisë Demokratike dhe Aleancës Popullore për Punë dhe Dinjitet.
Xhelal Mziu është diplomuar në fakultetin Ekonomik të Universitetit Bujqësor të Tiranës në vitin 1993. Ai u përfshi në lëvizjen studentore të viteve ’90 dhe në të njëjtën periudhë u angazhua në strukturat e Partisë Demokratike për zonën e Kamzës dhe Laprakës.
Në vitin 2005 u zgjodh kryetar i nëndegës së PD-së së Kamzës dhe në të njëjtin vit zgjidhet anëtar i Kryesisë dhe Këshillit Kombëtar të PD-së. Z.Mziu zotëron Master në ekonomi për “Drejtim Ndërmarrjesh” dhe në vitet 2009-2010 ka kryer edhe studimet doktorale. Prej vitit 2009, ai ka punuar si lektor i jashtëm në Universitetin e Durrësit dhe Universitetin Bujqësor të Tiranës. [Lexo CV-në e plotë]
Ky raport është prodhuar nga BIRN pas administrimit të deklaratave të pasurisë nga Inspektoriati i Lartë i Deklarimit dhe Kontrolli të Pasurive dhe Konfliktit të Interesit, ILDKPKI. Ai ka për qëllim bërjen e transparencës mbi pasuritë e kryetarëve aktualë të bashkive të vendit në fund të mandatit të tyre 4-vjeçar.
Skeda grafike e mëposhtme paraqet pasurinë e deklaruar nga kryetari i Bashkisë së Kamzës nga viti 2005 deri në fund të vitit 2017. [Kliko për skedën në PDF]
Skeda e pasurisë së deklaruar nga kryetari i Bashkisë së Kamzës, Xhelal Mziu nga viti 2005 deri ne vitin 2017.
Kryebashkiaku Xhelal Mziu deklaronte pasuri familjare me 1.5 milionë lekë në vitin 2005; kur deklaroi për herë të parë interesat e tij private pranë ILDKPKI. Në fund të vitit 2017, pasuria familjare e deklaruar është rritur mbi 3 herë, duke kapur vlerën e 4.9 milionë lekëve.
Pasuria familjare e Z.Mziu përbëhet nga një shtëpi dy-katëshe, për të cilën deklaron se ka investuar 4.1 milionë lekë për ndërtimin e plotë. Pas rivlerësimit, shtëpia kap vlerën e 5.7 milionë lekëve. Ai zotëron gjithashtu një automjet me vlerë 500 mijë lekë, kursime në cash prej 442 mijë lekësh dhe likujditete bankare prej 412 mijë lekësh.
Të ardhurat familjare për periudhën deklaruese janë 28.4 milionë lekë. Rreth 65% e të ardhurave kanë si burim pagën nga funksioni, ndërsa 30% pagën e bashkëshortes. Kryebashkiaku i Kamzës deklaron gjithashtu të ardhura në një masë të vogël nga mësimdhënia.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq’ që identifikohen gjatë kontrollit. BIRN kreu kontrollin aritmetik/logjik për 13 vite të deklarimit, të cilat rezultuan pa probleme.
Megjithatë, nga analiza cilësore e deklaratave të pasurisë u identifikuan si “flamuj të kuq” marrja e disa dërgesave bankare në vlera të konsiderueshme parash nga vëllai emigrant në Angli dhe kunati emigrant në Greqi. Z.Mziu deklaron gjithashtu dy borxhe të tjera marrë nga vëllai i tij.
Më konkretisht në vitin 2008, në njërën prej llogarive të subjektit janë dërguar 46 993 euro nga vëllai në Angli, ndërkohë që qëllimi i kësaj dërgese nuk sqarohet në deklaratë prej tij. Një vit më pas, në një llogari të dytë bankare janë dërguar nga vëllai i bashkëshortes 28 000 euro; destinacioni i së cilave është gjithashtu i paqartë.
Gjithashtu në vitet 2010 dhe 2016, kryebashkiaku Mziu ka marrë borxhe afatshkurtra nga i vëllai në vlerat 600 mijë dhe 900 mijë lekë.
Një tjetër “flamur i kuq” i identifikuar lidhet me deklaratën e vitit 2005, ku ai nuk deklaron asnjë të dhënë në rubrikat e formularit të deklarimit.
Deklarata Para Fillimit të Detyrës
Deklarata e pasurisë së vitit 2005
Deklarata e pasurisë së vitit 2006
Deklarata e pasurisë së vitit 2007
Deklarata e pasurisë së vitit 2008
Deklarata e pasurisë së vitit 2009
Deklarata e pasurisë së vitit 2010
Deklarata e pasurisë së vitit 2011
Deklarata e pasurisë së vitit 2012
Deklarata e pasurisë së vitit 2013
Deklarata e pasurisë së vitit 2014
Deklarata e pasurisë së vitit 2015
Deklarata e pasurisë së vitit 2016
Deklarata e pasurisë së vitit 2017
g.kosovari
