Igli Tare është shumë pranë rikthimit në Serie A. Milani është në kërkim të një drejtori të ri sportiv! Dhe gjasat janë të mëdha që 51-vjeçarit t’i besohet një pozicion delikat te “Djalli”.
Nisur nga ecuria aspak e mirë e këtij sezoni, drejtuesit kanë arritur në përfundimin se duhet një njeri me eksperiencë për të menaxhuar afrimet dhe largimet e futbollistëve, e për të ndihmuar kuqezinjtë t’i rikthehen sukseseve.
“Sportmediaset” raporton se kandidatët kryesorë janë ish-drejtori sportiv i Lacios dhe Fabio Paratici, që ka qenë pjesë e Juventusit, si edhe në dy vitet e fundit ka qenë pjesë e Totenhemit.
Në krye të listës ishte Andrea Berta, i cili u largua nga pozicioni i tij te Atletico Madrid në Janar, por ai tashmë e ka gjetur akordin për të nisur një eksperiencë të re në Premier League.
Të dy kanë zhvilluar bisedime me pronarin Gerry Cardinale dhe Zlatan Ibrahimovic në javën e kaluar dhe data 5 Mars është përcaktuar si zgjidhja përfundimtare.
Milani ka pasur interesim për Taren edhe në verën e vitit 2023 kur ai ishte ende pjesë e Lacios. Drejtuesit kuqezinj e vlerësojnë shqiptarin, nisur nga puna e bërë te bardhekaltrit në 14 vite.
Milani dëshiron që të planifikojë të ardhmen dhe pasi të jetë zgjedhur drejtori sportiv, do të mendohet edhe për stolin.
Me përjashtim të rezultateve befasuese deri në fund të sezonit, e ardhmja e Sergio Conceicao duket e vulosur dhe tashmë ka shumë emra që qarkullojnë për ta zëvendësuar.
