Andi Mustafaraj, i mbijetuari i atentatit në zemër të Tiranës, ruhet në spital nën masa të rrepta sigurie. Përgjatë 24 orëve, dy oficerë policie qëndrojnë në gatishmëri në derën e dhomës ku ndodhet i shtruar 29-vjeçari, i cili mori dy plumba në trup.
Burime nga policia thanë se mbrojtja ndaj tij është bërë për të parandaluar ndonjë ngjarje tjetër të mundshme, që mund të ketë pasoja të rënda.
“Gazeta Shqiptare” tentoi të kontaktonte me Andi Mustafarajn dhe familjarët e tij, por asnjëri prej tyre nuk pranoi të flasë rreth asaj se çfarë ndodhi një javë më parë në rrugën “Nikolla Jorgo”.
Bluzat e bardha të Spitalit të Traumës konfirmuan se, Andi Mustafaraj e ka kaluar rrezikun dhe tashmë ndodhet në gjendje më të mirë shëndetësore, por gjithsesi situata e tij po mbahet nën kontroll.
Policia e Tiranës po vijon hetimet për atentatin e ndodhur në zonën e ish-Ekspozitës, por deri më tani nuk është bërë identifikimi i autorëve të mundshëm të krimit. Ndonëse ka dyshime se atentati ndaj Mustafarajt është në vazhdën e konflikteve mes dy grupeve kriminale, deri më tani policia nuk ka mundur të sigurojë ndonjë provë që të mund t’i çojë tek autorët.
Ndërkohë, vetë i plagosuri nuk ka dhënë ndonjë dëshmi me vlerë që do të ndihmonte policinë në zbardhjen e ngjarjes. Mësohet se 29-vjeçari është marrë disa herë në pyetje, duke pohuar se nuk ka pasur konflikte me asnjë person dhe se nuk ka mundur të shohë se kush e qëlloi me armë.
Burime pranë policisë sqaruan se kamerat e sigurisë të lokalit ku ndodhi plagosja nuk kanë mundur të kapin asnjë lëvizje të autorëve, çka e bën edhe më të vështirë identifikimin dhe vënien e tyre në pranga. Andi Mustafaraj u qëllua nga persona ende të paidentifikuar mesditën e 28 tetorit, në momentin kur ai ishte ulur në një bar-kafe pranë ish-Ekspozitës.
Autorët qëlluan tri herë në drejtim të Mustafarajt dhe dy prej plumbave e kapën atë, njëri në shpatull dhe tjetri në bark. Burimet e sipërpërmendura thanë më tej, se atentati ndaj tij mund të jetë kryer nga vrasës me pagesë.
Ditën e ngjarjes, Policia e Tiranës tha zyrtarisht se Andi Mustafaraj është miku i ngushtë i Elton Çiços, person me precedent kriminal, i cili në 1 maj të këtij viti u ekzekutua me dy plumba në kokë në një lokal në zonën e ish-Bllokut. Për këtë ngjarje policia ka shpallur në kërkim shtetasit Jani Alia dhe Renato Milloshi./a.m.
