Mijëra qytetarë marshuan në Siçili për të protestuar kundër planit të qeverisë italiane për të ndërtuar një urë që do të lidhte Italinë kontinentale me ishullin e Mesdheut, Siçilinë, një projekt që do të sillte urën me harkun më të gjatë në botë.
Al Jazeera shkruan se rreth 10 mijë protestues morën pjesë në marshimin e zhvilluar të shtunën në qytetin e Mesinës për të kundërshtuar projektin e infrastrukturës me vlerë 13.5 miliardë euro (15.7 miliardë dollarë).
Qytetarët janë kundër projektit të propozuar për urën mbi ngushticën e Mesinës, për shkak të përmasave të tij të mëdha, rrezikut të tërmeteve, ndikimit mjedisor dhe mundësisë së përfshirjes së mafies.
Ideja për ndërtimin e kësaj ure është diskutuar për dekada, por këtë javë projekti mori një hap të madh përpara kur një komitet qeveritar që mbikëqyr investimet strategjike publike e miratoi planin.
Ministri i Transportit, Matteo Salvini, e cilësoi atë si “projektin më të madh të infrastrukturës në Perëndim”.
Salvini përmendi studime që parashikojnë se projekti do të krijojë deri në 120 mijë vende pune në vit dhe do të ndihmojë në nxitjen e zhvillimit ekonomik në Italinë e Jugut, ndërsa miliarda euro të tjera do të investohen në rrugë dhe përmirësime të tjera infrastrukturore.
Megjithatë, kritikët nuk janë të bindur dhe janë të zemëruar që rreth 500 familje do të duhet të shpërngulen për të hapur rrugë ndërtimit të urës. Salvini ka premtuar se këto familje do të kompensohen.
“Ngushtica e Mesinës nuk preket!”, brohorisnin protestuesit gjatë marshimit. Shumë mbanin pankarta ku shkruhej “No Ponte” (Jo Ura).
“Ata mund të më ofrojnë trefishin e vlerës së shtëpisë sime, por nuk më intereson. Ajo që më intereson është peizazhi. Ata nuk duhet të prekin ngushticën e Mesinës,” tha për Associated Press Mariolina De Francesco, 75 vjeçe, banuese në Mesinë, shtëpia e së cilës ndodhet pranë vendit ku parashikohet të ndërtohet një nga kullat tokësore të urës, 399 metra e lartë.
“Avokatët tanë do të ndërhyjnë dhe do t’i ndalojnë. Kjo është e sigurt,” shtoi ajo.
Ura e propozuar do të shtrihet në afro 3.7 kilometra (2.3 milje), me një seksion të varur prej 3.3 kilometrash, më shumë se 2 milje, duke ia kaluar urës së Çanakalasë në Turqi me 1 mijë e 277 metra, për t’u bërë ura më e gjatë e pezulluar në botë.
Punimet paraprake mund të fillojnë në fund të shtatorit ose në fillim të tetorit, në pritje të miratimit nga Gjykata. Ndërtimi i plotë është planifikuar të nisë në vitin 2026 dhe të përfundojë mes viteve 2032 dhe 2033.
Ura do të reduktonte kohën e kalimit të ngushticës me target, që aktualisht zgjat deri në 100 minuta, në vetëm 10 minuta me makinë. Trenat do të kursenin deri në 2.5 orë udhëtim, tha Salvini.
Qeveria italiane gjithashtu synon ta klasifikojë urën si projekt me rëndësi për mbrojtjen kombëtare, në përputhje me objektivin e NATO-s për të rritur shpenzimet ushtarake në 5% të PBB-së. Po ashtu qeveria argumenton se ura do të krijojë një korridor strategjik për lëvizje të shpejta të trupave dhe pajisjeve ushtarake, duke e cilësuar si “infrastrukturë që rrit sigurinë“.
Ndërkohë, organizatat mjedisore kanë paraqitur ankesa në Bashkimin Evropian, duke shprehur shqetësime se projekti do të ndikojë te shtegtimi i zogjve.
Presidenti i Italisë ka kërkuar gjithashtu që projekti të jetë subjekt i ligjit antimafia, që aplikohet për të gjitha projektet e mëdha të infrastrukturës.
