Një apartament në Borgo Bovio në periferi të Terni ka shërbyer si baza logjistike e një rrjeti multietnik të trafikantëve të kokainës në Itali. Mes tyre ishin edhe tre shqiptarë. Sipas hetuesve, grupi kishte në qarkullim disa mijëra euro në muaj ndërsa sot u godit nga policia lokale.

Nëntë persona u vunë në pranga me ekzekutimin e të njëjtit numër masash parandaluese të lëshuara nga gjyqtari hetues me kërkesë të prokurorit, prej të cilave gjashtë ishin burg dhe tre arrest në shtëpi, raportojnë mediat italiane, përcjell abcnews.al

Me finalizimin e këtij operacioni të koduar “Charon” në pranga përfunduan shtetas nga Afrika e Jugut, italianë dhe tre shqiptarët. Apartamenti që u kontrollua nga policia, sipas hetimeve është pronë e një banori tridhjetë vjeçar, i arrestuar kohët e fundit.

Në shtëpinë e të riut të arrestuar, sipas hetimeve të kryera gjatë vitit 2020, grupi i trafikuesve takoheshin, bënin ujdi dhe strategji për biznesin e tyre madje në prani të pronarit dhe një vajze të re. Droga, me një kosto prej 70 euro për dozë, u ishte shitur klientëve edhe pranë lokaleve në qendër të qytetit.

Sa i përket shqiptarëve të arrestuar, ata janë banues në  Terni ndërsa dy prej tyre janë futur në Itali në mënyrë të paligjshme. Sipas policisë, xhiroja e pronarit tridhjetë vjeçar italian të banesës është rreth 8 mijë euro në muaj. sb/abcnews.la/