Edi Rama ka bërë një mbarapakthehu në këtë prag fushate elektorale për zgjedhjet e 25 Prillit. PS e Edi Ramës nuk mban më logon e “Rilindjes”, me të cilën zëvendësoi trëndafilin që kjo forcë politike mbante që prej themelimit të saj në qershor të vitit 1991 kur në drejtimin e saj u vendos Fatos Nano.
Një lëvizje e papritur kjo e Edi Ramës, i cili hoqi logon e “Rilindjes” që vendosi vetë para zgjedhjeve të 2013, si një shenjë që simbolizonte rilindjen e vendit pas qeverisjes së Partisë Demokratike dhe Sali Berishës, por edhe si moment i ripërtëritjes së vetë Partisë Socialiste. Por pas 8 vitesh konsumi në qeverisje, akuzave për korrupsion dhe PPP të dyshimta, Rama ka vendosur të ndryshojë imazhin duke rikthyer siglën e vjetër të PS që po vetë e kishte zhdukur sapo erdhi në pushtet.
Ky ndryshim u vu re pasditen e së hënës para nisjes së mbledhjes së kryesisë së PS-së, ku u vendos përfundimisht lista e kandidatëve, e ku u shpalos edhe slogani për zgjedhjet e 25 Prillit “Shqipëria e Ardhmja Jonë”. E pikërisht në atë fjalë Rama duket se i parapriu kthimit në logon e vjetër dhe emblematike të PS-së, kur kujtoi se PS ka lindur nga vullneti i vetë ndryshimit dhe se vetë ndryshimi është pika e parë në manualin e PS të cilën e kishte si pikë referimi Fatos Nano më parë.
Por duket se me kthimin në logon e vjetër të PS-së Rama ka ndryshuar, por këtë radhë duke u kthyer tek trëndafili i 1991 e duke hequr dorë nga “Rilindja” e 2013.
/Balkanweb/
