Kryetari i Kuvendit, Ilir Meta i shoqëruar nga Ministri i Bujqësisë, Zhvillimit Rural dhe Administrimit të Ujërave, Edmond Panariti vizitoi fermën blegtorale “TRIS ALB” sh.p.k në Libofshë të Fierit.
Kryetari i Kuvendit u njoh me teknologjinë moderne të kësaj ferme, që aktualisht ka rreth 300 lopë dhe me një kapacitet prodhues prej rreth 2800 litra qumësht në ditë. Kjo fermë model është mbështetur edhe nga Ministria e Bujqësisë, Zhvillimit Rural dhe Administrimit të Ujërave përmes Agjencisë për Zhvillim Bujqësor dhe Rural.Meta tha se aplikimi i teknologjisë së fundit në ferma është një rrugë mjaft e suksesshme për zhvillimin e qëndrueshëm dhe po kështu dhe për rritjen e punësimit në mënyrë të sigurt dhe të qëndrueshëm.
“Është kënaqësi që të vizitoj një fermë të tillë blegtorale të teknologjisë më të fundit holandeze, e cila tregon se si duhet të punohet me cilësi dhe me teknologjinë e duhur për të shkuar drejt fermave të tilla me cikël të mbyllur, të cilat do t’i japin një mbështetje shumë më të madhe, jo vetëm industrisë së qumështit, por në përgjithësi gjithë rritjes së prodhimit në vend dhe natyrisht edhe uljes së importeve, jo vetëm për këto produkte, por në tërësi. Përveç saj, kjo është edhe një rrugë mjaft e suksesshme për zhvillimin e qëndrueshëm dhe po kështu dhe për rritjen e punësimit në mënyrë të sigurt dhe të qëndrueshëm”, – tha z. Meta.
Kryetari i Kuvendit theksoi se mbështetja më e madhe për bujqësinë dhe për ferma të tilla të teknologjisë më të avancuar, padyshim që do ta çojë bujqësinë tonë në stade akoma më cilësore dhe do t’i japë një hov të ri gjithë zhvillimit ekonomik të vendit.
Ministri i Bujqësisë, Zhvillimit Rural dhe Administrimit të Ujërave, z. Edmond Panariti deklaroi se është bërë një punë shumë e madhe për zhvillimin e bujqësisë dhe blegtorisë.
“Para tre vitesh kur ne filluam mandatin qeverisës arritëm të shpëtonim industrinë e qumështit nga falimenti sepse ishin në proces sekuestrimi dhe arritëm ta mbajmë atë në këmbë, duke garantuar që investitorët të futeshin dhe të ruanin këtë industri, e cila është një aset kombëtar. Por sfida e radhës ishte që kjo industri më pas të furnizoheshe në mënyrë të qëndrueshme me qumësht. Dhe ja ku është modeli që garanton këtë furnizim të qëndrueshëm me qumësht. Kemi të bëjmë me teknologjinë më të fundit të mbarështrimit të lopëve për qumësht ku praktikisht sot prodhohen 2800 litra qumësht në ditë. Kemi afërsisht 300 krerë lopë, por shumë shpejtë do të kalojmë në 500 krerë në përfundim të investimit”, – tha z. Panariti, i cili theksoi se Ministria e Bujqësisë nëpërmjet Agjencisë për Zhvillim Bujqësor dhe Rural e ka mbështetur këtë sipërmarrje me një fond prej 400 milion lekë të vjetra duke investuar nën linjat e përpunimit në tankerët dhe në teknologjinë përkatëse.
