Kreu i Partisë së Lirisë Ilir Meta ka ripërsëritur thirrjen e tij në drejtim të qeverisë për tërheqje nga amnistia fiskale.
Në një konferencë për mediet ditën e sotme, Meta, tha se kjo iniciativë do të favorizonte qartësisht botën e krimit dhe do të godiste biznesin e ndershëm.
Gjithashtu, sipas kreut të PL, kjo iniciativë do të dëmtojë procesin e integrimit në Bashkimin Evropian.
“Ne nuk kemi ende një administratë tatimore dhe me mjetet e duhura të kontrollit dhe zbatimit të ligjit dhe njëkohësisht duhet një kornizë efektive në luftën kundër pastrimit të parave dhe luftën kundër terrorizmit. Kjo iniciativë e kryeministrit aktual do të favorizonte qartësisht botën e krimit, duke i ofruar mundësi që të ardhurat e përfituara nga krimi të pushtojnë ekonominë vendase. Do të goditej biznesi i ndershëm dhe do dekurajoheshin investimet e huaja në Shqipëri.
Do të minojë besimin e shoqërisë te shteti i së drejtës dhe do të nxitej edhe më shumë ekonomia informale. Do minoheshin përpjekjet për të luftuar krimin e organizuar, i cili sipas raporteve e ka kthyer Shqipërinë në një baza operacionale. Sikurse ka përsëritur BE do dëmtohej procesi i bashkëpunimit me vendet partnere dhe vetë procesi i integrimit në BE”, tha Meta.
/a.r
