Kryetari i Kuvendit Ilir Meta pati një takim me Koordinatorin e OKB dhe Përfaqësuesin e PNUD në Tiranë,Brian Williams, ku në fokus të diskutimve ishte zbatimi i projektit Një OKB dhe arritjet e konferencës globale të mjedisit COP21 në Paris.
Meta vlerësoi Konferencën e fundit globale COP21 në Paris dhe vuri në dukje se Shqipëria do të japë kontributin e saj maksimal në mbështetje të përpjekjeve globale për përballimin e sfidave të ngrohjes globale dhe ndryshimeve klimaterike.
Koordinatori Rezident i OKB dhe Përfaqësuesi i PNUD-it në Shqipëri, Brian Williams shprehu kënaqësinë për misionin e tij të ri në vendin tonë dhe theksoi se në kuadër të programit të bashkëpunimit mes OKB dhe Shqipërisë, PNUD mbetet e gatshme të intensifikojë kontaktet me të gjithë aktorët qeveritare dhe jo-qeveritarë në Shqipëri dhe në këtë drejtim forcimi i bashkëpunimit me Kuvendin merr një dimension të veçantë.
Williams vuri në dukje se reforma e gjerë e OKB ka të bëjë me rritjen e efiçencës dhe në këtë drejtim, OKB do të jetë e gatshme ta shoqërojë Shqipërinë përgjatë rrugëtimit të saj integrues në Bashkimin Evropian, si dhe në fusha të tjera prioritare për zhvillimin social dhe ekonomik të vendit.