Presidenti i zgjedhur Ilir Meta ka njoftuar dorëheqjen nga të gjitha funksionet drejtuese të LSI. Ai deklaroi gjatë një konference për mediat se ky vendim do të zyrtarizohet sot në mbrëmje, duke konfirmuar se nuk do të jetë drejtus i fushatës së kësaj force.
“Edhe pse mund të vazhdoj të jem kryetar i LSI deri në 23 Korrik, kam vendosur që sot në mbrëmje pas përfundimit të listave të LSI, të heq dorë nga ky funksion dhe të gjitha funksionet drejtuese në LSI. Po kështu, në listën e partive që do të dorëzohen në krah të LSI nuk do jetë emri i Ilir Metës por i Petrit Vasilit”, tha Meta.
Po ashtu, Meta deklaroi se do të vijojë të mbajë postin e kreut të Kuvendit deri kur të betohet për postin e ri të kreut të shtetit.
“Pas konsultimeve, eshe pse detyrime e mia si president fillojnë pas betimit dhe deri atëherë mund të vijoj me të gjtiha angazhimet e mia politike dhe insittucionale mund t’ju bëj të ditur se do të vijoj të jem kryetar i Kuvendit deri në ditën e betimit si president i vendit, pra do të jap dorëheqjen përpara këtij betimi për arsye të vetë lidhjes midis këtyre institucioneve në planin kushtetues e institucional. Por edhe për faktin se të enjten e ardhshme do të jetë seanca e fundit plenare, kështu që për këto arsye do jem në detyrë, deri përpara betimit si president”, tha Meta më tej.
Meta tha se do të dorëzojë teserën e Lsi një ditë para se ai të betohet si president. Por, duket se ai ka lënë të hapur rikthimin në këtë forcë që ka themeluar pas përfundimit të mandatit 5-vjeçar si president kur tha se “do t’u kërkojë drejtuesve të LSI ta ruajnë mirë teserën”.
“Do t’u kërkoj ta ruajnë atë dokument, pavarësisht se në këto 5 vite nuk do ndikohem nga kjo lidhje e fortë që unë kam me LSI që është edhe lidhje shpirtërore dhe njerëzore. Në 5 vitet e ardhshme udhëhiqem nga kushtetuta”, tha Meta.
Meta deklaroi se do të bëjë gjithçka për dialogun me opozitën.
“Jam i angazhuar të takohem me kreun e PD zotin Basha, dhe çdo drejtues të opozitës që ka dëshirë. Jam duke bërë cdo investim që të evitojmë një përkqeqësim të situatës politike në vend dhe të krijojmë atë klime konstruktiviteti në mënyrë që të kemi legjitimitet të institucioneve të ardhshme”, tha ai.
/a.m.
