Kryetari i Kuvendit, Ilir Meta, ka deklaruar pas takimit me kryedemokratin Lulzim Basha se të enjten Reforma në Drejtësi do të votohet me çdo kusht nga Parlamenti. Ai falënderoi kryeministrin Rama dhe Bashën, duke i cilësuar të dy si konstruktivë, “pavarësisht retorikave pas takimeve”.
Meta iu drejtua Brukselit dhe Uashingtonit se të enjten do të hidhet hapi i madh historik.
“Jemi shumë pranë marrëveshjes. Falënderoj Ramën e Bashën që kanë qenë konstruktiv, pavarësisht retorikës pas takimeve. Jemi të angazhuar për miratimin me konsensus sipas Venecias. Falënderoj ekspertët. Duhet t’iu siguroj se të enjten në orën 10:00 Kuvendi do të fillojë me këtë çështje. Siguroj Uashingtonin dhe Brukselin se pavarësisht retorikave dhe zhurmave mediatike, Republika e Shqipërisë do të hedhë një hap të vërtetë madhor dhe historik për dekadat që vijnë për forxcimin e shtetit ligjor, luftë kundër korrupsionit dhe kundër krimit të organizuar vetëm sipas konsensusit dhe sipas Venecias. Nuk mundet të luftohet korrupsioni as me korrupsion dhe aq më keq me krim të organizuar. Të enjten në orën 10:00 Kuvendi fillon dhe nuk mbaron derisa të miratohet kjo reformë me konsensus dhe sipas Venecias dhe që padyshim do të hedhë një hap historik ditën e enjte”, u shpreh kreu i Kuvendit, Meta.
Ai vlerësoi kryeministrin Edi Rama se është më konstruktivi nga të gjitha palët e përfshira në procesin e reformës në drejtësi. “Kryeministri është më konstrktivi nga të gjithë ne katër aktorët e tjerë”, tha Meta.
Ai bëri të ditur edhe premtimin e Bashës se votat e demokratëve të enjten do të jenë për miratimin e Reformës në Drejtësi. “Ajo që pengon është retorika helmuese publike. U bëj thirrje të gjithëve, edhe aktorëve vendas e atyre ndërkombëtarë, që të përqendrohen tek çështja dhe Venecia”.
d.i.
