Kriza e refugjatëve është një problem europian dhe kërkon zgjidhje europiane. Ky ka qenë apeli i bërë nga Kryetari i Kuvendit, Ilir Meta, në konferencën me kryeparlamentarët e Shqipërisë, Kroacisë, Italisë, Greqisë, Sllovenisë dhe Malit të Zi, që po mbahet në Split të Kroacisë. “Europa nuk duhet të ngrejë mure. Shqipëria do bëjë pjesën e saj brenda mundësive në bashkëpunim me partnerët evropianë. Kriza kërkon koordinim evropian të strukturave të sigurisë dhe inteligjencës”, ka nënvizuar Meta. Kreu i Kuvendit tha më tej se duhet të mbrojmë hapësirën tonë “por duke mos prekur vlerat evropiane të solidaritetit”.
Nga ana tjetër Meta është shprehur se “Bashkimi Europian nuk duhet të humbasë vëmendjen ndaj rajonit tonë”. Meta tha se “avancimi i integrimit, garanci për sigurinë evropiane”.
