Presidenti Ilir Meta thotë se pellgu i Mesdheut është i bekuar që ka shtrirjen e kufirit të Bashkimit Europian në këtë rajon dhe se Shqipëria është një vend kandidat për në BE dhe tashmë përfiton nga shumë programe europiane që synojnë fuqizimin e rinisë.
Ai shprehet se dhjetëra mijëra studentë shqiptarë studiojnë në shkollat dhe universitetet evropiane dhe se qindra syresh janë përfitues të drejtpërdrejtë të trajnimeve profesionale vendore.
Por ai thotë se ne jemi ende shumë larg për sa i takon potencialit tonë të mundshëm në industrinë detare dhe të turizmi, duke thënë se është ende i paeksploruar, i pajisur me perspektivë për zhvillim të mëtejshëm.
Duke folur nga Marseja e Francës, ku ishte i ftuar nderi në Konferencën ndërkombëtare të zhvilluar në Marsejë me temë “Mesdheu i së Ardhmes”, ai tha se sektorë të tjerë potencialë përfshijnë bujqësinë dhe Teknologjitë e Informimit dhe Komunikimit, të cilat kanë filluar të lulëzojnë tashmë në vend.
Por Presidenti thotë, përveç kësaj tablojeje emocionuese, i duhet të pranojë që Shqipëria po përballet me sfida serioze.
Në këtë drejtim deklaroi se lëvizshmëria e të rinjve mund të jetë një diçka e mirë dhe mund të konsiderohet si bekim por, në njëfarë mënyre, ajo mund të shndërrohet edhe në një mallkim, nëse njerëzit nuk kthehen sërish në vendin e tyre.
Meta tha se fatkeqësisht, në rajonin e Ballkanit, kjo dukuri po bëhet më shqetësuese, pasi të rinjtë e kanë më të lehtë të largohen dhe të rehatohen në një jetë më mirë, në vend që të qëndrojnë në atdheun e tyre dhe të përpiqen e të luftojnë për ta ndryshuar atë.
Për kreun e shtetit, ky është një kërcënim i drejtpërdrejtë për zhvillimin tonë ekonomik dhe kohezionin social.
Sipas tij, nëse nuk trajtohet në shkaqet dhe rrënjët e tij, ai mund të prodhojë një cikël të rrezikshëm vicioz që vështirë se mund të shpërthehet e të këputet.
Prandaj kreu i shtetit, konsideron se nuk ka gjë më të rëndësishme se mbajtja e të rinjve për të jetuar dhe punuar në Shqipëri.
“Ne duhet ta kombinojmë arsimin edhe më cilësor me mirëqeverisjen dhe politikat publike që u japin përparësi investimeve të mbështetur në aftësitë për të cilat ka nevojë ekonomia jonë dhe sektori privat”, deklaroi ndër të tjera Presidenti.
Po ashtu tha se është detyrë e politikanëve që të jenë udhërrëfyesit e tyre në mënyrë që ëndrrat e të rinjve të bëhen realitet.
“Ne na duhet të pajisim me dije dhe fuqi shumë të rinj anembanë Mesdheut për të garantuar një Mesdhe më të sigurt dhe akoma edhe më të begatë, sepse rajoni mesdhetar është më i bukuri në botë, me potenciale të mëdha për një rritje dhe zhvillim më të shpejtë, të mbështetur në burimet tona natyrore. Kështu që e ardhmja e rajonit tonë varet nga arsimimi më i mirë dhe motivimi i brezave tanë të ardhshëm!”, deklaroi Meta.
/b.d
