Kryetari i Kuvendit, Ilir Meta, i shoqëruar dhe nga Ministri i Bujqësisë, Zhvillimit Rural dhe Administrimit të Ujërave, Edmond Panariti mori pjesë në inaugurimin e rehabilitimit të kanalit vaditës Vjosë-Levan.
Kryetari i Kuvendit u njoh nga afër me investimin e kryer dhe me mundësitë e reja që krijohen për rritjen e mëtejshme për bujqësinë.
Duke folur gjatë këtij inspektimi, z. Meta shprehu besimin se me angazhimin e treguar dhe me një mbështetje edhe më të madhe në të ardhmen, bujqësia do të jetë një sektor tërheqës i transformimit të ekonomisë
“Mendoj se rehabilitimi dhe vënia e plotë në punë e këtij kanali kaq të rëndësishëm për të gjithë këtë zonë dhe për Myzeqenë, Vjosën dhe Fierin është mjaft e rëndësishme për të mbështetur të gjithë fermerët në këtë zonë në mënyrë që ata të vënë më shumë sipërfaqe toke në punë, në mënyrë që ata të kenë prodhime më të mira. Në këtë drejtim duhet të vazhdojë kjo punë e shkëlqyer që është bërë këtu në të gjithë Shqipërinë për të përmirësuar infrastrukturën e tokave bujqësore në shërbim të kullimit të vaditjes, të rritjes së prodhimeve bujqësore pasi kjo është e domosdoshme për të rritur ekonominë e vendit tonë, për të përmirësuar të ardhurat e fermerëve tanë , për të hapur vende të reja pune. Unë besoj se me këtë angazhim, me këtë energji dhe me një mbështetje edhe më të madhe në të ardhmen, ne do të bëjmë të mundur që bujqësia të jetë një sektor tërheqës i transformimit të ekonomisë sonë kombëtare, por edhe familjare”, – tha z. Meta.
Ministri i Bujqësisë, Zhvillimit Rural dhe Administrimit të Ujërave, z. Edmond Panariti vlerësoi se është bërë një punë e jashtëzakonshme për të rikonstruktuar këtë kanal vaditës që konsiderohet si aorta e bujqësisë shqiptare.
“Ne këtu ndodhemi në një nga veprat e artit të kanalit të vaditjes Vjosë-Levan i cili njihet edhe si arteria kryesore, apo aorta e bujqësisë shqiptare, pasi vadit fushat pjellore të Myzeqesë, të gjithë këtij rajoni në një shtrirje prej 32 kilometrash. Ky kanal para dy vjetësh ka qenë totalisht i bllokuar, ishte i mbushur me sedimente, me shkurre dhe në sajë të një pune energjike, të investimit të bërë nga Ministria e Bujqësisë është realizuar një vëllim i jashtëzakonshëm pune. Janë zhvendosur me qindra mijëra kub dhera dhe sedimente. Kanali tashmë është funksional, i gatshëm për të përballuar të gjithë nevojat e bujqësisë për vaditje”, – tha z. Panariti duke shtuar se Ministria që ai drejton ka punuar në dy drejtime.
“Në radhë të parë në vaditjen e tokave bujqësore dhe pikërisht si rezultat i kësaj pune shumë të mirë që është bërë ne kemi pasur dyfishim të eksporteve dhe të prodhimeve bujqësore. Pa ujë nuk ka bujqësi. Nga ana tjetër, Ministria e Bujqësisë me bordet e kullimit po investohet fuqimisht edhe në mbrojtjen e bujqësisë nga përmbytjet. Fillimisht mbrojmë dhe pastaj zhvillojmë. Kjo është një shpresë shumë e mirë për bujqësinë, që pikërisht si rezultat i këtyre ndërhyrjeve në infrastrukturën e kullimit dhe vaditjes është në gjendje që të shpalosë të gjithë potencialin e saj prodhues dhe eksportues”, tha z. Panariti.
