Kuvendi ka njoftuar sot se kreu i saj, Ilir Meta, ka vendosur ta ndërpresë vizitën në SHBA dhe të vijë me urgjencë në Tiranë. Sipas institucionit në fjalë, ardhja e Metës bëhet me qëllim që të sqarohet konfuzioni i krijuar ditët e fundit në lidhje me seancën e së enjtes.
Por, seanca e rekomanduar nga ndërkombëtarët për kalimin sa më të shpejtë të 7 ligjeve ku përfshihet edhe vettingu, ka hasur në kundërshtitë e opozitës. Së pari, PD pretendon se drafti ku reflektohen ndryshimet kushtetuese është shpërndarë mbrëmë nga Euralius dhe deputetët e opozitës nuk kanë kohë për ta lexuar. Po ashtu, edhe hapësira kohore nga dekretimi i Presidentit e deri te votimi i 7 ligjeve, është një tjetër argument i PD.
Duke qenë se situata u krijua nga PD, nuk dihet se me kë do ta zgjidhë Meta konfuzionin në Tiranë ndërkohë që kryetarin e opozitës e ka me vete në SHBA.
