Lëvizja Socialiste për Integrim ka mbledhur Komitetin Drejtues, ku kryetari Ilir Meta tha se partia e tij është e vendosur për Reformën në Drejtësi. Meta e quajti Reformën si një detyrë kombëtare.
“LSI mendon dhe beson që miratimi i reformës në drejtësi është një detyrë kombëtare. Është një përgjegjësi e jashtëzakonshme që duhet përmbushur për interesin e qytetarëve tanë. Për të goditur në mënyrë të vendosur korrupsionin dhe krimin e organizuar që janë një shqetësim mjaft serioz për qytetarët dhe pengesë mjaft serioze për zhvillimin me të shpejtë të vendit dhe integrimin me të shpejtë në BE. Nuk mund të ketë një rekomandim dhe një hap tjetër të Shqipërisë drejt çeljes së negociatave për anëtarësim në rast se kjo reformë nuk miratohet dhe nuk miratohet tani.”- deklaroi Meta.
Kreu i LSI-së theksoi se çdo vonesë në miratimin e reformës do të jetë e kushtueshme, për ecjen përpara të Shqipërisë në rrugën drejt BE-së.
“Ne mbajmë përgjegjësi për LSI, për ata që kanë votuar tek ne dhe që besojnë tek ne, por natyrisht që mbajnë përgjegjësi për të gjithë qytetarët shqiptarë që në shumicën dërrmuese e kërkojnë këtë reformë. Shpresojmë që të gjitha palët politike ta miratojnë këtë reforme. Për ne është i mjaftueshëm certifikimi i Euralius dhe ODAT për miratimin e kësaj reforme. Është një pengesë e madhe mosbesimi që ekziston mes palëve. Unë besoj se standardet që ofron Komisioni i Venecias dhe zgjidhjet e propozuara nga Euralius dhe ODAT janë të nevojshme që ne ti japim jetë kësaj reforme në parlament brenda muajit qershor. Çdo vonesë do të ishte e kushtueshme. Nënvizoj vendosmërinë e LSI për të votuar këtë reformë sipas standardit të Komisionit të Venecias dhe zgjidhjeve që janë dhënë nga Euralius dhe ODAT që tani.”- theksoi Meta.
Kreu i LSI theksoi edhe rëndësinë e miratimit në kohë të reformës zgjedhore, në mënyrë që palët që do të marrin pjesë në proces të jetën të përgatitura.
“Reforma në drejtësi do të hapë një faqe të re në luftën kundër korrupsionit dhe krimit të organizuar, si dhe do të krijojë kushte shumë të mira për zhvillimin ekonomik të vendit. Po kështu do të përmirësohet klima e biznesit. Reforma vjen pas miratimit të legjislacionit për dekriminalizmin, i cili ka dhënë efektet e para. LSI mbetet e vendosur për të mbështetur këto reforma. Elemente me rekorde kriminale nuk kanë vend në përfaqësimin publik. Ky është një detyrim dhe borxh që u kemi qytetarëve shqiptarë. Reforma në drejtësi dhe vazhdimi pa pengesa i procesit të dekriminalizmit, duhet shoqëruar edhe me reformën zgjedhore. E cila duhet bërë tani, dhe të mos lihet për momentin e fundit, në mënyrë që të gjithë aktorët që marrin pjesë në zgjedhje të jetë të përgatitur për lojën elektorale, në mënyrë që vota e çdo shqiptari të jetë e shenjtë dhe e pacenueshme. Këto janë detyrim për jetën demokratike dhe institucionale në vend. Njoftojmë të gjithë anëtarësinë tonë për zhvillimin e zgjedhjeve të reja në LSI”, tha Meta.
Kreu i LSI shprehu ndërkaq vlerësime edhe përfaqësuesit e Lëvizjes Rinore për Integrim dhe rezultatet e arritura.
“Dëgjojmë fjalët më të mira për përfaqësuesit e Lëvizjes Rinore për Integrim kudo. Forumeve që do zgjidhen në LSI do t’u jepet një frymë më e mirë e bashkëpunimit, solidaritetit, dhe qëllimeve më të mira për vendin. Këto zgjedhje duhen parë si një mundësi për të treguar standardet më të larta demokratike”, tha Meta.
d.i.
