Problemi kompleks i dekorimeve, mori përmasat e një skandali të vërtetë gjatë presidencës së Ilir Metës.
Duke filluar nga 24 korriku 2017, kur edhe ul në karrigen e presidentit, Ilir Meta ka dekoruar më shumë se 560 individë, grupe foklorike, skuadra futbolli, heronj të vrarë në beteja të ndryshme apo edhe organizata të ndryshme.
Shpërndarja e dekoratave me bollëk nisi nga presidenti Bujar Nishani, i cili ishte ndër më të kontestuarit në këtë drejtim.
Gjatë 5 viteve të presidencës së tij, Nishani shpërndau afërsisht 200 medalje. Megjithatë kjo shifër nuk ka të krahasur me numrin marramendës që ka shpërndarë Ilir Meta, ndërsa për të kuptuar inflacionin galopant që ka pësuar ky fenomen mjafton të shikojmë që Gjermania me 80 milion banorë shpërndan rreth 30 dekorata në vit.
Por a kemi vërtetë kaq shumë njerëz të jashtëzakonshëm, që të meritojnë këtë nderim të madh të shtetit shqiptar? Ekspertët janë skeptikë. Sipas tyre, përkundër numrit të lartë të dekoratave për qindra njerëz të shquar çdo vit, vendi ynë rregjistron arritje minimale në të gjitha sektorët.
“Jo inflacion, por përtej inflacionit. Nëse ne do ta kishim zhvillimin e Shqipërisë të niveleve të një shteti mesatar në Europë, atëherë le të jepen dekorata. Por nëse ne nuk e kemi këë zhvillim, atëherë kjo punë kaq e vlefshme, kaq e merituar ku është?” u shpreh Suzana Varvarica, Studiuese.
Por dihet tashmë se kënga e Baftjarit ia ka “rrëmbyer” zemrën presidentit Meta. Si duket kjo ka qenë një arsye më shumë, që në fillim të këtij viti, Presidenti dekoroi me titullin “Mjeshtër i Madh”, këngëtarin e saj Ylli Baka, një këngëtar i njohur dasmash e këngësh popullore.
Gjatë një ceremonie të zhvilluar në Dibër në shtator të vitit 2020, Meta nderoi në mesin e artistëve dibranë edhe Shaban Mziun. Një këngëtar që nuk i kalon kufinjtë e trevës së tij dhe pa ndonjë veçanti, u nderua me titullin “Mjeshëtr i Madh”. Duket se një nga meritat është kënga që i kushtuar Rrahman Mziut, babai i Xhelal Mziut, që tashmë është edhe deputet i Dibrës nën siglen e Partise Demokratike.
Rrok Gjelaj një tjetër këngëtar lokal në Malësinë e Madhe, u nderua me titullin “Mjeshtër i Madh” në tetor të 2020-ës me motivacionin “Për mjeshtërinë e lartë artistike në krijimin dhe interpretimin e këngëve popullore”. Duket se kënga më e sukseshme e tij është ajo kushtuar koronavirusit.
