Presidenti i Republikës ka komentuar ditën e sotme zgjedhjen e kryeprokurorit të ri dhe vonesën në dekretimin e kreut të SHISH.
Ilir Meta tha sot se për emrin e kreut të Akuzës duhet një dialog mes palëve. Sipas tij me rëndësi ka të zbatohet Kushtetuta dhe zgjedhja e pasuesit të Adriatik Llallës është përgjegjësi e Kuvendit.
“Është përgjegjësi ekskluzive e Kuvendit të Shqipërisë. Duhet të respektohet Kushtetuta dhe fryma e saj. Kjo është e rëndësishme që të ketë mes aktorëve kryesorë një dialog të shpejtë, të përgjegjshëm dhe të bazuar në standarde transparente për zgjidhjen e kësaj çështje pasi çdo hap i njëanshëm s’do i ndihmonte konsolidimit të pavarësisë dhe rritjes së besimit te institucionet e drejtësisë” – tha ai.
Ndërkohë presidenti Meta komentoi edhe propozimin e kryeministrit për kreun e ri të Shërbimit Informativ të Shtetit.
Meta la të nënkuptohet se emri i Helidon Bendos nuk po dekretohet ende pasi institucioni i presidencës kërkon të bindet më shumë në lidhje me propozimin.
“Duhet të keni në konsideratë që një vendimarrje e tillë është e rendësishme dhe presidenti duhet të jetë i bindur se një vendimarrje përfundimtare forcon pavarësinë e një institucioni kaq të rëndësishëm për sigurinë kombëtare” – tha presidenti.
Deklaratat e Metës erdhën gjatë një konference të përbashkët për shtyp me homologun malazez Filip Vujanoviç. /JAVANEWS/b.d
