Ilir Meta ka kërkuar sot nga SPAK dhe institucionet e drejtësisë të hetojnë për atë që ai dhe opozita e quajnë vjedhje e të dhënave të qytetarëve.
Meta ka akuzuar sot PS për një gjest të papranueshëm dhe të poshtër.
Ai tha nga Pogradeci se koha kur shqiptarët që kishin frikë nga qeveria ka mbaruar përgjithmonë.
“Drejtuar SPAK dhe institucioneve të drejtësisë për të hetuar me shpejtësi ngjarjen më të fundit, skandaloze atë të keqpërdorimit dhe të vjedhjes nga ana e PS në çdo lloj forme që kjo ka ndodhur të të dhënave personale të të gjithë qytetarëve shqiptarë, të dhëna që mbrohen nga ligji dhe që përdoren vetëm për interesin publik.
Është një shkelje e papranueshme dhe e poshtër e çdo norme dhe çdo morali për të vendosur bazën e të dhënave personale në dispozicion vetëm një force politike, të asaj që ka kapur shtetin dhe që nuk pranon të lërë pushtetin dhe për këtë arsye përdor këto forma të poshtra dhe për këtë arsye iu bën presion qytetarëve shqiptarë. Koha kur shqiptarët që kishin frikë nga qeveria ka mbaruar përgjithmonë, data e fundit ishte 2 marsi”, deklaroi Presidenti Meta.
/a.r
