Presidenti Ilir Meta ka refuzuar t’i japë nënshtetësinë shqiptare bashkëshortes së një luftëtari shqiptar të UÇK-së nga qyteti i Shkodrës, Bashkim Shkodra.
Ky i fundit, në një intervistë për emisionin “Dua të të bëj të lumtur” tregon se ka 11 vite i martuar me një zonjë nga Drenica dhe ka 6 fëmijë.
Pavarësisht kësaj, Shkodra tregon se për të bërë nënshtëtësinë i kanë kërkuar para.
“Kemi 11 vite martesë me të por kam problem se nuk ja japin nënshtetësinë shqiptare. Arsyeja është se më kanë lypur pare dhe unë nuk kam para.
Jetoj me vuajtje, nuk kam forcë të paguaj. Kam 11 vite martesë dhe 6 fëmijë. S’kam kërkuar asgjë nga kontributi im në luftë se e kam bërë me shpirt, jam nisur për të vdekur në luftë”, u shpreh luftëtari.
Ndërkohë, moderatorja Arbana Osmani i bëri thirrje kreut të shtetit për të reflektuar lidhur me këtë rast nisur edhe nga kontributi që Bashkim Shkodra ka dhënë për lirinë e Kosovës.
Ushtari Shkodra ishte plagosur rëndë dhe kishte marrë dy plumba në luftën e Kosovës, një prej të cilit e ka akoma në trup pasi nxjerrja e tij do t’a paralizonte.
Pasi ishte plagosur, atë e kishin sjellë në Shqipëri shokët e luftës, që të shërohej, e të rikuperohej.
Ai gjatë këtyre 21 viteve kishte pasur një jetë tepër të vështirë, pasi për shkak të plagës nuk mund të punonte dhe problemet ekonomike ishin përkeqësuar.(TemA)
g.kosovari
