Shumë i shqetësuar është shfaqur sot presidenti Ilir Meta, teksa ka komentuar zjarrin që ra tek ‘Sarajet’.
Përmes Facebook, ai shkruan se kjo është vepër e babëzisë së betonit.
Presidenti madje ka informacione se te Pallati i Brigadave do ndërtohen kulla.
“Tirana u gdhi sot me një tjetër monument kulture, “Sarajet”, gati të shkrumbuar nga zjarrvënia e qëllimshme.
Ky akt kriminal dhe i dënueshëm është përdorur rëndom vitet e fundit, për t’i hapur udhën ndërtimit të kullave, “lavatriçeve të pastrimit të parave” në kryeqytet, siç denoncojnë edhe organizatat prestigjioze ndërkombëtare.
Viktimë e “piromanëve” ra pak ditë më parë edhe kurora e gjelbër në “Pallatin e Brigadave”, ku gjithashtu është planifikuar të ndërtohet një kompleks kullash.
Babëzia e shfrenuar e betonit në Tiranë ka shkatërruar shumë monumente historike, tradicionale, kulturore dhe objekte të rëndësisë së veçantë, ndërkohë edhe ato pak të mbetura rrezikohen të zhduken përgjithmonë.
Gjenocidi kulturor, barbaria ndaj identitetit tonë kombëtar dhe kushdo që luan me zjarrin për përfitim personal në dëm të interesit publik, meriton të ndëshkohet me të gjithë ashpërsinë e ligjit. Nxis organin e Prokurorisë, SPAK si dhe të gjitha institucionet ligjzbatuese përgjegjëse të marrin çdo masë efektive për hetimin me transparencë dhe nxjerrjen para drejtësisë penale të autorëve, frymëzuesve dhe përfituesve të kësaj veprimtarie kriminale” – shprehet Ilir Meta.
Kujtojmë se Presidenti prej një jave ka gjetur kohë për tërmetin në Haiti, për dekoratat që shpërndan apo për përvjetore vdekjesh… Por s’ka mbajtur asnjë qëndrim për ardhjen e afganëve në Shqipëri dhe mbështetjen e SHBA për qeverinë.
/javanews/a.r
