Festa e Flamurit ka bashkuar sot Presidentin Ilir Meta dhe kryeministrin Edi Rama. Në ceremoninë e mbrëmjes të organizuar nga kreu i shtetit shqiptar, Meta dhe Rama kanë trokitur edhe gotat.
Në fjalën e tij, Presidenti Meta u ndal në procesin e hapjes së negociatave të Shqipërisë me BE, për të cilën tha se do punojmë që kjo të ndodhë në 2018.
Thirrja e Presidentit të Republikës ishte për unitet.
“Pa unitet politik dhe gjithpërfshirje nuk mund të projektohen qëllime madhore. Çdogjë i lidh shqiptarët me Europën dhe asgjë nuk i ndan ata prej saj”, u shpreh ai.
“Ne besojmë dhe do të punojmë që viti 2018 të kurorëzojë përpjekjen tonë për hapjen e negociatave të Shqipërisë për anëtarësim në BE, si njëkohësisht të garantojë të drejtën legjitime të qytetarëve të Kosovës për të lëvizur të lirë në hapësirën Shengen si gjithë qytetarët e tjerë të Ballkanit Perëndimor”
Meta tha gjithashtu se ky është momenti që të shërbejë për reflektim për konsolidimin e demokracisë dhe forcimin e qeverisjes.
“Këto momente kulmore të historisë së lavdishme të popullit tonë na shërbejnë për reflektime të mëdha në mobilizimin e energjive mbarë kombëtare, për ruajtjen e lirisë dhe pavarësisë, për konsolidimin e demorkacisë, forcimin e sundimit të ligjit, përmirësimin e qeverisjes, forcimin e institucioneve, respektimin e të drejtave të njeriut, zhvillimin e ekonomisë së tregut dhe anëtarësimin në BE. Në të njëjtën kohë ne riafirmojmë vullnetin tonë për promovimin e paqes dhe stabilitetit në rajon bashkëpunimin e palëkundur me aleatët në luftën kundër ekstremizmit ndërkombëtar”
a.ç
