I shoqëruar nga bashkëshortja Monika Kryemadhi dhe tre fëmijët, kreu i Partisë së Lirisë Ilir Meta ka votuar në Qendrën e tij të Votimit të vendosur në kopshtin 31.
Meta ka hedhur votën i pari, ndërsa më pas kanë qenë fëmijët dhe bashkëshortja. Vajza e madhe ka evidentuar një njollë të vulës në fletën e votimit dhe është dashur të ndërrojë fletën.
Pas votimit kreu i PL ka dhënë një mesazh për qytetarët, duke i ftuar të votojnë sepse kështu kanë mundësi edhe të kërkojnë llogari.
Meta tha se sot është një ditë e madhe për Shqipërinë pasi merr fund monizmi absolut.
“Ishte kënaqësi e madhe të votoja sot. Sot votuam si familje e kompletuar se për herë të parë votoi dhe Era.
Unë kam vetëm një lutje për të gjithë qytetarët e Tiranës dhe gjithë Shqipërisë, pjesëmarrje, pjesëmarrje dhe përsëri pjesëmarrje. Vetë demokracia është pjesëmarrje dhe nuk ka ndryshim pa pjesëmarrje. E drejta më e rëndësishme që ka një qytetar është vota. Një qytetar që nuk ushtron këtë të drejtë nuk ka të drejtë as të kërkojë llogari. Ushtroni këtë të drejtë sot. Vetëm përmes pjesëmarrjes ju mund të bëheni pjesë e ndryshimit dhe t’i kërkoni llogari të gjithëve. Ditë e madhe për Shqipërinë, merr fund monizmi absolut”, deklaroi Meta.
/a.r
