Paketa e ndryshimeve kushtetuese në kuadër të reformës në drejtësi duket se do t’i hapë rrugën edhe martesave gay. Kjo bazuar në ndryshimin e nenit 18 të kushtetutës. Ndryshimet që i hapin rrugën martesave brenda së njëjtës gjinie, u bënë me dije nga deputetja e PDIU Mesila Doda, e cila shprehu kundërshtitë e saj.
Ajo tha se të gjithë deputetët duhet të bëhen bashkë për të mos miratuar një nen që është kundër natyrës.
Ja postimi i plotë i Dodës në facebook:
Vazhdon Konspiracioni Kundër Familjes
Në heshtje, fare pa u ndjerë kaloi lajmi që Komisioni i posaçëm për Reformën aprovoi nenin që ndryshonte nenin 18 të Kushtetutës, pika 2, i cili ndryshohet si vijon:
Askush nuk mund të diskriminohet padrejtësisht për shkaqe të tilla si gjinia, raca, feja, etnia, gjuha, bindjet politike, fetare a filozofike, identiteti gjinor, orientimi seksual, gjendja ekonomike, pasurore, arsimore, origjina sociale, lindja, aftësia e kufizuar, përkatësia shoqërore, prindërore ose të tjera.
Në paragrafin e mësipërm janë shtuar togfjalshat orientimi seksual dhe identiteti gjinor.
Futja e këtyre togfjalshave çel rrugën për goditjen dhe rrëzimin e menjëhershëm të nenit 7 të Kodit të Familjes, i cili parashikon se “Martesa mund të lidhet ndërmjet një burri dhe një gruaje”. Ky nen nuk ka asnjë lidhje e asnjë arsye të futet si mish i huaj bashkë me paketën Kushtetuese për Drejtësinë.
Të përmirsojme sistemin e drejtësisë, Po. Të godasim strukturën tonë shoqërore, JO.
Unë i bëj thirrje çdo kolegu të kundërshtojë aprovimin e një neni të tillë që godet thelbin e sistemit tonë shoqëror. Asnjë reformë apo ndryshim në emër të së cilës fshihet një deviacion i tillë i familjes nuk mund të gjej përkrahjen e deputetëve dhe cilitdo burri, gruaje, vajze a djali që kërkojnë një jetë në respekt të ligjeve natyrore e atyre hyjnore. Unë nuk e votoj një nen të tillë. Le të bashkohemi të gjithë për ti thënë jo këti atentati kundër familjes./a.m.
