Në meshën e tij të parë të natës së Krishtlindjes si Papë, Leoni XIV ka denoncuar ashpër një ekonomi që, sipas tij, “i shtyn njerëzit të trajtohen si mall”. Ai theksoi se mesazhi i Krishtit është çlirimi i njeriut nga çdo formë skllavërie.
“Ndërsa një ekonomi e shtrembëruar i trajton njerëzit si mall, Zoti bëhet i ngjashëm me ne, duke zbuluar dinjitetin e pafund të çdo personi”, u shpreh Papa, emri i vërtetë i të cilit është Robert Francis Prevost.
Ai nënvizoi kontrastin mes ambicies njerëzore për dominim dhe mesazhit hyjnor të shërbimit.
“Ndërsa njeriu kërkon të bëhet Zot për të sunduar mbi të tjerët, Zoti bëhet njeri për të na çliruar nga çdo skllavëri. A mjafton kjo dashuri për të ndryshuar historinë tonë”, pyeti në mënyrë retorike Ati i Shenjtë.
Gjatë pontifikatit të tij, Leoni XIV ka folur vazhdimisht kundër pabarazive globale dhe përqendrimit të pasurisë në duart e pak individëve, duke i bërë thirrje Kishës që të jetë pranë më të varfërve. Edhe zgjedhja e emrit papnor nuk është rastësore: Ajo i referohet Papa Leonit XIII, themeluesit të doktrinës moderne sociale të Kishës, dhe tregon vëmendjen e veçantë që Papa i ri i kushton çështjeve të punës dhe drejtësisë sociale në një epokë të shënuar nga revolucioni digjital.
Në homelinë e mbajtur në Bazilikën e Shën Pjetrit, Papa foli për lindjen e Jezusit, e shënuar nga shfaqja e një ylli.
“Nuk ka errësirë që ky yll të mos e ndriçojë, sepse në dritën e tij e gjithë njerëzimi sheh agimin e një jete të re dhe të përjetshme”, tha Leone XIV.
Ai paralajmëroi se kur humbet e vërteta thelbësore e dinjitetit njerëzor, “nuk ka më vend për të tjerët, për fëmijët, për të varfrit, për të huajt”. Papa citoi fjalë të Papa Benediktit XVI, duke theksuar aktualitetin e tyre.
“Në tokë nuk ka vend për Zotin, nëse nuk ka vend për njeriun. Mospranimi i njërit do të thotë mospranim i tjetrit”, tha ai.
Duke iu referuar plagëve të botës së sotme, Leoni XIV tha se përballë dhimbjes, dhunës dhe shtypjes, Zoti përgjigjet jo me forcë, por me një fëmijë.
“Përballë dhunës dhe mbizotërimit, Ai ndez një dritë të butë që ndriçon me shpëtim të gjithë bijtë e kësaj bote”, u shpreh Papa.
Papa kujtoi se një vit më parë, me hapjen e Portës së Shenjtë, Papa Françesku kishte theksuar se Krishtlindja ringjall shpresën atje ku ajo është shuar. Tani, teksa Jubileu i Shpresës po i afrohet përmbylljes më 5 janar, Leone XIV nënvizoi se Krishtlindja është “kohë falënderimi dhe misioni”.
“Me besimin, dashurinë dhe shpresën në zemër, pa frikë nga nata, mund t’i dalim përpara agimit të një dite të re”, tha ai.
Para nisjes së meshës, Papa Leoni XIV doli në shesh për të përshëndetur besimtarët që kishin mbetur jashtë Bazilikës së Shën Pjetrit, pavarësisht shiut. “Mirëmbrëma, mirë se vini të gjithë”, tha ai në disa gjuhë, duke falenderuar besimtarët për guximin dhe praninë e tyre. Sipas të dhënave zyrtare, rreth 6 mijë besimtarë ndoqën meshën brenda bazilikës dhe rreth 5 mijë të tjerë jashtë saj.
