“E fëmijëve mbetet e gjithë arsyeja themelore përse politika duhet të ekzistojë, përse partitë duhet të ndeshen në betejën e vizioneve dhe të ideve për të nesërmen”.
Me këtë mesazh iu drejtua ditën e sotme Kongresit të Partisë Socialiste në Tiranë, Linda Rama, bashkëshortja e kryeministrit dhe njëherësh kryetarit të Partisë Socialiste, Edi Rama.
Kushdo që e njeh nga afër rrugëtimin profesional të Lindës, e ka të lehtë ta kuptojë se ky nuk është një mesazh rastësor, e as rutinor, siç jemi mësuar të dëgjojmë pambarimisht nga foltoret e kongreseve partiake.
Është në fakt jo vetëm mesazhi i një nëne, por edhe i një gruaje profesioniste që fëmijët i ka patur në fokusin e punës së saj me shoqërinë civile. Eksperienca e saj profesionale lidhet fort me ndjeshmërinë për fëmijët.
Linda Rama është një nga bashkëthemelueset e Aleancës Shqiptare të Fëmijëve, advokuese e fushatës “Thuaj po për fëmijët”. Aleanca, me një mision të veçantë në shoqërinë shqiptare është pararendëse e Lëvizjes Botërore për Fëmijët.
Pikërisht në vitin 2000, në raportin e takimit të parë të Asamblesë Kombëtare të Aleancës, do të veçohej fjala e Lindës, e cila pati sjellë me fakte e të dhëna, situatën e fëmijëve shqiptarë në ato vite.
“Me gjuhën e fakteve dhe figurave, prezantimi i saj nënvijëzoi problemet madhore që janë shndërruar një barrë në jetën e fëmijëve, pasojë kjo e tranzicionit të vështirë nëpër të cilin po kalon shqipëria. Arsimi shqiptar ka një numër burimesh njerëzore, financiare dhe materiale të pamjaftueshme, përkundër kërkesave dhe pritshmërive tepër të larta. Një numër i konsiderueshëm studentësh, kryesisht nga zonat e varfëra apo rurale po braktisin arsimin në sistemin 8 vjeçar dhe nuk po ndjekin arsimin e mesëm për shkak të problemeve të lidhura me të ardhurat e pamjaftueshme familjare dhe një rënie në nivelin dhe cilësinë e dukimit”, shkruhet në raport.
Ky prezantim i vitit 2000 nga Linda, në Aleancën Shqiptare të Fëmijëve është një copëz dëshmie e faktit se për bashkëshorten e Kryeministrit, e “nesërmja” nuk është thjesht dhe vetëm një detyrim që duhet përmbushur nga politika dhe njerëzit rreth saj.
“E nesërmja” për Lindën është një vokacion për të cilin ia vlen të luftosh nga çdo arenë, nga çdo kënd, nga çdo pozitë, nga çdo status, në emër të fëmijëve tanë dhe brezave që do të vijnë pas tyre!
