Ylli i skuadrës madrilene Cristiano Ronaldo në një intervistë për Mundo Deportivo ka thënë se ai është krijuar për të qenë më i miri dhe është rezultat e mundit që ka kaluar gjatë gjithë jetës së tij për të arritur në majat e futbollit ndërkombëtar. Në ndeshjen e shkuar mes Real Sociedad ai u fishkëllye nga shumë tifozë pasi humbi një penallti, gjë që ka bërë që CR7 të reagojë për të thënë se kritikat janë të mirëpritura. Ronaldo ka shtuar se kritikat për personalitetin e tij dhe sjelljet vanitoze apo arrogante nuk e shqetësojnë atë, pasi sipas tij ato vijnë për shkak të suksesit që ai ka patur.
“Ne nuk mund të jetojmë duke qenë të obsesionuar me atë se çfarë thonë të tjerët. Është e pamundur të jetosh ashtu. As vetë Zoti nuk mund të kënaqë të gjithë botën”- ka thënë Ylli i Los Blancos.
“Unë kam një ndërgjegje të pastër dhe më zë gjumi natën rehat. Ndihem mirë kur ndihmoj të tjerët, pavarësisht nëse bëhet fjalë për gjëra të mëdha apo të vogla. Tanimë, që kur jam bërë baba, e shikoj jetën ndryshe. Mund të them se jam i aftë ta përballoj presionin sepse kam patur një jetë të vështirë. Ky që unë jam tani është një rezultat i kohës së harxhuar me familjen time dhe vështirësive që kam përjetuar. Që në moshën 11 vjeçare unë isha duke i hekurosur vetë rrobat e mia dhe forca ime mendore nis që në ato kohëra. Nëse kjo është ajo që jam, dhe nëse gjithçka që kam arritur në futboll është për këtë, nuk mund të kërkoj për më shumë”- ka përfunduar fjalën e tij Ronaldo.
