Ministri për Evropën dhe Punët e Jashtme, Ditmir Bushati që nga Brukseli i ka bërë apel opozitës që të shohë integrimin dhe anëtarësimin e Shqipërisë në Bashkimin Evropian si një përparësi kombëtare, mbi përfitimet politike.
Bushati është takuar në Bruksel me ministrat e vendeve anëtare dhe kandidate të BE, ku është diskutuar për perspektivën e zgjerimit.
Kreu i diplomacisë shqiptare ka marrë një rikonfirmim të fortë të mbështetjes nga ana e vendeve të BE por dhe vlerësimin maksimal për reformat shtetkonsoliduese dhe reformën në drejtësi dhe Vettingun, sidomos hapat e hedhur në implementimin e këtyre reformave si dhe luftën kundër krimit të organizuar, korrupsionit dhe kultivimit të narkotikëve.
“Me ministrat e vendeve anëtarë të Bashkimit Evropian dhe vendeve kandidate, sot, diskutuam në lidhje me perspektiven e zgjerimit.
Jam i gëzuar sepse u rikonfirmua një mbështetje e qartë për politikën e zgjerimit, për procesin e reformave shtetkonsoliduese në Shqipëri, kryesisht për reformën në drejtësi dhe hapat e para që janë ndërmarrë në procesin e Vettingut, për luftën kundër krimit të organizuar, korrupsionit dhe kultivimit të narkotikëve.
Për rolin e Shqipërisë, për qartësinë strategjike përsa i përket linjëzimit të politikës së jashtme dhe për faktin që Shqipëria sot është më afër se kurrë pranë një vendimmarrje për fillimin e bisedimeve për anëtarësim në Bashkimin Evropian.
Natyrisht, puna nuk ka përfunduar, në të kundërt i gjithë ky motivim që vjen nga ana e vendeve anëtare e Bashkimit Evropian duhet të nxisë gjithë forcat politike parlamentare, jo thjeshtë Partinë Socialiste dhe qeverinë.
Për të vijuar më tej me reformat për të zbatuar reformën në drejtësi në tërësinë e saj dhe në mënyrë të plotë dhe për të hequr një e nga një të gjitha pengesat që vijnë në këtë drejtim.
Sepse proçesi i vendimmarrjes për fillimin e bisedimeve për anëtarësim në Bashkimin Evropian është dhe duhet të përbëjë një përparësi kombëtare dhe duhet të dali mbi çdo lloj sherrnaje politike dhe mbi çdo lloj paragjykimi partiak”, deklaroi Bushati nga Brukseli.
