“Qetësisë së çuditshme” i vjen fundi. Të hënën nis sesioni i ri parlamentar në një mbledhje që edhe pse është më tepër ceremoniale, nuk përjashtohet të ketë debate të ashpra.
Në pritje është shqyrtimi i dekretit të presidentit Meta për projektligjin e Teatrit Kombëtar.
Kryedemokrati Lulzim Basha ka paralajmëruar se rrëzimi i dekretit është “vija e kuqe” dhe ka paralajmëruar përballje të ashpër në parlament dhe jashtë sallës.
Seancë e parë e sesionit të ri mbahet të hënën pasdite në orën 17:00. Edhe pse ajo është thjesht një seancë konstituimi për sesionin e ri, opozita duket se po përgatitet për “aksion”.
Në seancën e së hënës parashikohet të miratohet edhe kalendari 6-javor i punës ku do përfshihet edhe projektligji i teatrit, që sipas gjasave do të lihet për në datën 13 Shtator.
Opozita ka parashikuar para seancës mbledhjen e grupit parlamentar ku do të diskutohet strategjia që do ndiqet. Nuk përjashtohet që të organizohet protestë jashtë sallës ditën kur do të jetë për shqyrtim dekreti i presidentit për projektligjin e teatrit. Kryetarja e LSI ka deklaruar se “do të rrethojmë parlamentin”.
Partia Socialiste ka parashikuar mbledhjen e kryesisë. Mbledhja vjen pak ditë para Asamblesë të së premtes ku pritet të merret vendim nëse do ketë ndryshime në qeveri./a.m.
