Merkel: Shqipëria dhe Kosova s’kanë luftë civile, azilkërkuesit…
Polemikat mbi çështjen e refugjatëve e emigrantëve, duket se kanë njohur një tjetër përshkallëzim të ri gjatë ditës së djeshme në Gjermani, ndërsa Selia qendrore e Partisë Socialdemokrate Gjermane në Berlin, është kërcënuar me bombë.
Kështu ka konfirmuar dje për “Der Spiegel”, Sekretarja e Përgjithshme e kësaj partie, Yasmin Fahimi, e cila ka pohuar se në telefonin e SPD-së gjermane ka mbërritur një thirrje rreth orës 15.00 në të cilën dëgjohej një kërcënim për bombë. Partia e ka marrë seriozisht këtë kërcënim dhe të gjithë punonjësit e saj janë detyruar të evakuohen përkohësisht, derisa policia ka bërë verifikimet e nevojshme dhe ka siguruar se nuk është gjetur asnjë mjet apo lëndë shpërthyese. Më pas, ata janë kthyer në ambientet e punës.
Po ashtu, është evakuuar sipas “Berliner Morgenpost”, edhe një ndërtesë tjetër që i përkiste Bashkisë së Berlinit. Sipas “Der Spiegel”, gjithçka ka ardhur pas deklaratave të kreut të socialdemokratëve gjermanë dhe njëkohësisht, zëvendëskancelar i RFGJ-së e ministër i Ekonomisë, Siegmar Gabriel, i cili gjatë vizitës së tij të djeshme në Heidenau, pikërisht në vendin ku ndodhën edhe trazirat e dy ditëve më parë me sfond racist e antiemigrator, kishte folur me tone të ashpra kundër ekstremistëve të djathtë gjermanë. Gjithashtu, nga e njëjta seli, u konfirmua fakti se ishin marrë edhe shumë email-e kërcënuese, të cilat, sipas anëtarëve të SPD-së gjermane, janë sigurisht një shprehje e pastër e akteve politike ekstreme. Vetë SPD-ja deklaroi se nuk do të lëvizë asnjë milimetër nga qëndrimet e saj në lidhje me refugjatët, edhe pas kërcënimeve të fundit që i janë bërë, duke i dënuar ato me ashpërsi.
Ministri i Brendshëm gjerman, Thomas De Maiziere, deklaroi se nuk i duhej lënë shumë vëmendje publike të tilla kërcënimeve, duke e relativizuar disi ngjarjen. Po dje gjatë ditës, kancelarja gjermane, Angela Merkel ka zhvilluar një bisedë të hapur e të gjatë mbi 100-minutëshe, në një lagje të qytetit të Duisburgut në Gjermaninë Perëndimore, i banuar nga shumë turq e të huaj. Ajo ka pohuar, ndër të tjera, se situata me refugjatët e Europës, nuk është “dinjitoze” dhe se ata kanë nevojë për ndihmë.
Më tej, ajo ka theksuar se: “Serbia, Shqipëria dhe Kosova, nuk janë në luftë civile”, duke pohuar gjithashtu se janë vetëm tre deri në katër vende ato që po e ndajnë barrën e rëndë të refugjatëve mes tyre, nga 28 të tillë që ka Bashkimi Europian, çka, tha ajo, nuk është e drejtë. Në përfundim të bashkëbisedimit që u zhvillua në një hotel të qytetit, mediat gjermane kanë njoftuar se janë dëgjuar edhe thirrje kundër “zonjës së hekurt” dhe CDU-së gjermane. Kancelarja Angela Merkel e dënoi gjithashtu ashpër dhunën e treguar ndaj azilkërkuesve në qytetin lindor të Heidenaut, pranë Drezdenit, ku në përleshjet me tubuesit mbetën të plagosur dhjetëra oficerë policie.
