Mënyrat për të ushtruar trurin
Mbajtja e trupit në formë ka përfitime të mëdha për shëndetin dhe kujtesën, ndërtimin e sinapseve të reja, dhe madje ndihmon në parandalimin e sëmundjes së alcajmerit. Përfshirja e sa më shumë aktiviteteve fizike në rutinën tuaj të përditëshme do të rrisë aftësinë mendore, do ta mbajë trurin më të mprehtë dhe më në formë.
Bëni ecje: është ushtrim i rekomanduar për të gjitha moshat. Gjatë kohës që trupi lëviz, truri furnizohet me oksigjen. Kjo gjë forcon sinapset që lidhin neuronet dhe e mbajnë trurin të mprehtë gjatë gjithë ditës. Bëni ecje 30 minuta në ditë, do ta furnizoni trurin me energji dhe do të reduktoni stresin dhe ankthin.
Dëgjoni: kjo është një mënyrë shumë e thjeshtë për të trajtuar kujtesën përmes veshëve dhe mendjes. Gjatë dëgjimit ju i kushtoni vëmendje në detaje asaj ç’po ju thonë dhe përpiqeni ta riprodhoni atë duke e kujtuar më vonë.
Lexoni dhe shkruani: sudoku, pazëllat, fjalëkryqet të japin kënaqësi, por nuk janë domosdoshmërisht ushtrimet më të mira të trurit. Leximi dhe shkrimi ju bën ta angazhoni trurin në mënyra të tjera, sepse jeni duke mësuar apo krijuar një informacion të ri. Tregimet, romanet janë shumë interesante, sepse vënë në punë imagjinatën.
Ushqehuni shëndetshëm: ushqimi është një ndër aleatët më kryesore në funksionimin e mirë të trurit, sepse ai ndikon në kujtesën e mirë dhe furnizimin e trurit me energji. Hani fruta, perime, yndyrna të shëndetshme të tilla si acidet yndyrore omega3 dhe kufizoni përdorimin e tepërt të karbohidrateve.
Mësoni gjëra të reja: aftësia për të marrë informacione të reja bën pjesë në kategorinë sfiduese të ushtrimeve të trurit. Mësimi i një gjuhe të huaj, luajtja e një instrumenti muzikor, memorizimi i një kënge apo poezie janë mënyra shumë të mira për të ushtruar trurin.
