Një ditë pas arrestimit nga policia me akuzën e “shpërdorimit të detyrës”, Gjykata e Tiranës ka dhënë dje masën e sigurisë për dy punonjësit e bankës, Luigj Gjonaj dhe Florian Skarra. Gjykata vendosi detyrim paraqitje për drejtorin e filialit, Gjonaj, ndërsa la në burg shefin e sigurisë së Bankës, Florian Skarra.
Ata u arrestuan një ditë më parë pasi me veprimet dhe mosveprimet e tyre kanë lejuar grabitjen e Bankës, ndonëse sinjali i alarmit i ka njoftuar dy herë të premten në orën 20:00 dhe të shtunë në orën 5 të mëgjesit.
Policia dhe prokuroria kanë ngritur dyshime të forta mbi dy persona që mund të jenë të imlikuar në këtë ngjarje, por po punon për identifikimin e tyre me prova konkrete.
Momenti i kapjes nga kamera së fytyrës të njërit prej grabitësve, do shërbejë për nisjen e verifikimeve të mëtejshme, për të hedhur dritë mbi ngjarjen dhe identifikuar grabitësit.
Menduan për lëvizje të minjve
Në të gjitha alarmet e rëna nga e premtja në mbrëmje deri të shtunën, kur sipas hetuesve janë marrë paratë, pretendimi që kanë ngritur si Drejtori i bankës Luigj Gjonaj dhe Florian Skarra, shef i sigurisë së filialit është se pas kontrolleve nuk kanë konstatuar asnjë lëvizje të dyshimtë dhe kanë menduar se sinjali i alarmit binte nga ndonjë insekt i mbetur brenda degës ose lëvizje të minjve. Rezulton se në dy prej rasteve kur ka rënë alarmi, dy punonjësit Gjonaj dhe Skarra kanë hapur derën e kasafortës dhe kanë kqyrur pa u futur më në brendësi të dhomës se paratë ishin të palëvizura. Burime nga grupi hetimor, thanë se autorët kanë punuar me vegla pune, si daltë e çekiç, për të mos bërë zhurmë. Veglat e gjetura në vendin e ngjarjes, bishta cigaresh dhe shishe uji, janë dërguar për ekspertizë.
Pamjet filmike
Pamjet filmike të një kamera të instaluar në dhomën e kasafortës së bankës, janë prova kryesore e policisë dhe prokurorisë së Tiranës. Filmimet e rregjistruara nga kjo kamera tashmë janë sekuestruar me urdhër të prokurorisë. Sipas burimeve nga policia, në këto filmime njëra nga autorët e vjedhjes duket qartësisht në pjesën e fytyrës, pasi është kthyer në pjesën ballore të saj. Aktualisht hetimet janë përqëndruar pikërisht në këtë moment me shpresën e identifikimit të shpejtë të autorit, që është fiksuar nga filmimet e kameras.
“Në këtë drejtim po punohet shumë me ekspertë të laboratorit të policisë shkencore dhe oficerë të policisë kriminale, me qëllim identifikimin e këtij personi”- thanë burimet pranë grupit hetimor. Ndërkohë dyshime të forta janë ngritur prej hetuesve se në këtë ngjarje mund të ketë gisht ndonjë prej punonjës ose ish-punonjësve të bankës, që mund tu ketë dhënë iformacion grabitësve lidhur me koordinatat e sakta të vendodhjes së kasafortës së bankës në ish-bllok. /shqiptarja.com
