Forcimi i mëtejshëm i lidhjeve në të gjitha fushat mes noterëve shqiptar dhe atyre kosovarë, i cili do t’i shërbejë edhe rritjes së bashkëpunimit ekonomik e tregtar mes Shqipërisë dhe Kosovës është synimi kryesor i memorandumit të bashkëpunimit nënshkruar sot mes Shqipërisë dhe Kosovës në fushën e noterisë.
Memorandumi u bashkëfirmos në Ministrisë e Drejtësisë në Tiranë nga zj. Mimoza Sadushi dhe zj. Arbena SHEHU, reciprokisht Presidentet e Dhomave Kombëtare të Noterisë në të dy vendet tona, ndërsa të pranishëm gjatë kësaj ceremonia kanë qenë përfaqësues të lartë nga Ministritë e Drejtësisë së të dyja vendeve. Nënshkrimi i këtij memorandumi vendos në baza institucionale bashkëpunimin mes dy dhomave.
Të pranishmit kanë përshëndetur gjatë kësaj ceremonie faktin që mbështetës në këtë bashkëpunim janë edhe Ministritë e Drejtësisë por edhe Unioni Ndërkombëtar i Noterëve, i cili përfaqësohej në këtë ceremoni nga z. Mishel Merlotti, drejtues i lartë i këtij Unioni.
Përmes këtij memorandumi, palët kanë për qëllim të vendosin një bashkëpunim të ndërsjelltë e të frutshmëm ndërmjet tyre, duke u anagazhuar ndërmarrjen e veprimeve konkrete lidhur me shkëmbimin profesional nëpërmjet formimit teknik – juridik e profesional, për të realizuar një njohje reciproke të dispozitave që rregullojnë veprimtarinë noteriale në të dyja vendet si dhe redaktimin e akteve noteriale.
Gjithashtu palët angazhohen për organizimin dhe pjesëmarrjen në takime të përbashkëta për përmirësimin e punës në drejtim të përmbushjes së detyrimeve, që burojnë nga legjislacioni civil ne vendet dhe ligjet perkatese si dhe për ndërmarrjen e studimeve dhe projekteve të përbashkëta për përafrimin e praktikave, etj.
Në përfundim të ceremonisë, Dhoma Kombëtare e Noterisë së Shqipërisë njoftoi se në kuadër të konkretizimit të kësaj marrëveshje bashkëpunimi, ditën e nesërme rreth 60 noterë të Republikës së Kosovës do të trajnohen mbi disa çështje me rëndësi në fushën e jurisprudencës si, kontratat e kredisë, pasurive të paluajtshme, trashëgimisë dhe sipërmarrjes.
