Në ditën e fundit të fushatës elektorale, kandidati i PD-së për bashkinë e Tiranës, Roland Bejko i pati në takimet me tregtarët e zonës së Medresesë dhe të Freskut ku prezantoi programin që synon dhënien e frymëmarrjes për Tiranën.
“Ne do të ulim taksën e ndërtimit nga 12% në 5% me qëllim që të ndihmojmë në uljen e çmimit të banesave. Ne do ta marrim taksën 3% nga ndërtimet, në para dhe në objekt me qëllim që çiftet e reja, nënat kryefamiljare dhe të pastrehët e Tiranës të kenë mundësi ku të strehohen”.
Ai deklaroi se nëse zgjidhet në krye të bashkisë prioritet do të jenë edhe zonat rurale me ndërtimin e 250 kilometër rrugë rurale, në mënyrë që fermerët vendas ta kenë më të lehtë aksesin në 5 tregjet që do të ndërtohen në hyrje të Tiranës. Po ashtu do të krijohen edhe tri zona të lira ekonomike, në Krrabë, Arbanë dhe Ndroq.
“Ndërtimin e 5 tregjeve, në 5 pikat hyrëse të qytetit me qëllim që prodhimi vendas të shitet në kilometrin 0 dhe qytetarët të ushqehen shëndetshëm dhe banorët e fshatrave të kenë mundësi të rrisin ekonominë e tyre familjare. Ne kemi premtuar zero taksa për turizmin, për këdo nga ju që do hapë një bujtinë, që do zhvillojë agroturizmin, zero taksa”.
Në fund Bejko u bëri thirrje të gjithë qytetarëve dhe demokratëve që të dielën të votojnë numrin 9 dhe 6 në mënyrë që të mos e çojnë votën dëm për Ilir Metën.
“Mos e çoni votën dëm duke votuar Ilir Metën. Votoni vetëm Partinë Demokratike numrin 9, votoni numrin 6 kandidatin e saj, kandidatin tuaj, kandidatin e demokratëve që përfaqësohen sot nga unë e nesër nga dikush tjetër, por nga djem të ndershëm të këtij populli”, përfundoi Bejko.
Ai bëri thirrje për pjesëmarrje masive në zgjedhjet 14 majit.
