Duket se idenë e presidentit Meta, të shpallur ditën e djeshme për një referendum, kanë filluar ta artikulojnë me shumë pathos medias pranë tij. Edhe pse për ta zhvilluar nje referendum duhen thjesht 50 mijë firma, zyra e shtypit e presidentit thotë se do mblidhen mbi 1 milionë firma ne menyre që Kushtetuta të votohet nga populli.
Ajo meton se do fillojë në çdo qytet marrja e firmave me kartë ID. Të majtë e të djathtë, të paparti apo kush dëshiron demokraci do t’i kërkohet kjo për Republikën, sipas njoftimeve që japin këto media.
Dje presidenti me një retorikë gati alarmante ka thënë se Republika është në rrezik:
“Shqiptarët të hapin sytë, të marrin fatin e tyre në dorë, në mbrojtje të Kushtetutës dhe që fëmijët e tyre të mos ikin më nga sytë këmbët në atdheun e tyre! Kushtetuta e Republikës është Vija e Kuqe dhe e kuqe flakë, e pakalueshme nga armiqtë e saj dhe të Republikës së gjithë shqiptarëve! Shqipëria nuk është dhe nuk do të jetë shpresëhumbur! Presidenti do të jetë në mbrojtje të drejtpërdrejt të Lirive dhe të drejtave themelore të Popullit Shqiptar! Presidenti do të kërkojë mbështetjen e mbarë popullit shqiptar, që përmes Referendumit të mbrojë Republikën”,- deklaroi dje kreu i shtetit.
Por, që të bëhet kjo duhen sërish ndryshime në Kushtetutë dhe sidomos kjo behet me verdiktin qe mungon me funksionalizimin e GJykates Kushtetuese, e bllokuar po prej tij.
E gjitha kjo ndermarrje duhet te respektoje dokumentin themeltar të shtetit miratuar në vitin 1998 dhe ndryshuar dy here gjatë vitit 2008 dhe 2016, ku realisht në Kushtetutë ka ardhur serish krijimi i situatave të krizës në të cilën ndodhemi sot dhe ku vetë Meta ka një rol jo pak të vogël për këtë kaos.
