Media ndërkombëtare i ka kushtuar vëmendje arrestimit të Klement Balilit duke e konsideruar si ”një hap të madh përpara të Shqipërisë drejt Bashkimit Europian”.
“Trafikanti shqiptar i drogës në arrati dorëzohet pas tre vitesh”, shkruan prestigjiozja britanike “Daily Mail”, në një artikull ku thekson se ”lufta kundër krimit të organizuar është prioriteti i Shqipërisë në rrugën drejt BE-së”.
“Një prej personave më të kërkuar në Shqipëri u dorëzua tek Prokuroria e Krimeve të Rënda”, shkruan IBNA (Independent Balkan News Agency).
“Për Balilin kishte edhe një urdhërarresti ndërkombëtar. Ai kërkohej në shumë vende për trafikim të lëndëve narkotike dhe njihej me pseudonimin Eskobari i Ballkanit”, thekson IBNA-ja.
Edhe portalet e njohura kanadez “Toronto CityNews” dhe “CityNews Vancouver” njoftojnë për dorëzimin e Balilit duke cituar ministrin e Brendshëm shqiptar, Sander Lleshi, sipas të cilit “Kelmend Balili u dorëzua pas një operacioni të gjatë dhe të komplikuar”.
“Balili, një ish-zyrtar i administratës vendore të qytetit jugor të Sarandës, ka qenë në arrati pas një urdhërarresti nga Greqia fqinje, që e konsideron atë si kreun e trafikimit të lëndëve narkotike”, shkruan “Associated Press” (AP).
“Lufta kundër krimit të organizuar, trafikimit të drogës dhe korrupsionit janë prioritetet kryesore të Shqipërisë, që synon të hapë negociatat për anëtarësim me Bashkimin Europian këtë vit”, thekson AP-ja.
/ATSH/a.rada
