Projektligji i depozituar në Parlament nga deputetja e Partisë Demokratike Majlinda Bregu për fshirjen e komenteve ofenduese dhe që cënojnë personalitetin e individit në mediatt online ka krijuar jehonë të madhe edhe në Itali.
Sipas asaj që kanë publikuar mediat italiane, këtë projektligj ata e kanë cilësuar si një tentativë për të “shtrënguar” lirinë e medias.
“Referuar debateve që ky projektligj ka sjellë në Shqipëri si dhe pretendimin e ekspertëve dhe përfaqësuesve të mediave në vendin tonë, mediat italiane e shohin këtë si një mënyrë për të rritur nivelin e autocensurës së gazetarisë shqiptare. Ideja e projektligjit është që të rregullojë komentet ofenduese dhe denigruese të vizitorëve në portalet “online”, por sipas mendimit të disa ekspertëve në komunikim, kjo është një masë që mund të rrisë nivelin e autocensurës në gazetari” – shkruajnë mediat italiane.
E kontaktuar nga JavaNeës.al pak ditë më parë, deputetja Bregu theksoi se kjo nuk është aspak një tentativë për të kufizuar lirinë e medias. Sipas saj kjo bëhet për arsyen e vetme që të ndalen komentet me natyrë denigruese ndaj personalitetit të njeriut dhe që nuk kanë aspak lidhje me vetë lajmin.
Në bazë të projektligjit, administratori i portalit online do të duhet që të fshijë komentet ofenduese, pasi në të kundërt do të duhet të përballet me drejtësinë. Projektligji është shqyrtuar edhe në komisionet parlamentare ndërsa pritet që të hidhet për votim në Kuvend.
Redaksia Online
(JavaNews.al)
