Media gjermane Süddeutsche Zeitung në një analizë mbi raportin e Bashkimit Evropian me Ballkanin Perëndimor ku sërish nuk u hapën negociatat me Shqipërinë dhe Maqedoninë e Veriut, për shkak të vetos bullgare ndaj Shkupit zyrtar, shpjegon se Franca dhe Bullgaria janë shkaktarët kryesorë për ndalimin e zgjerimit të BE-së.
Sipas medias gjermane përgjatë viteve të fundit, Ballkani Perëndimor është poshtëruar vazhdimisht nga Franca dhe Bullgaria në rrugëtimin drejt Bashkimit Evropian.
Megjithatë media gjermane vlerëson lëvizjen e parlamentit bullgar në miratimin e rezolutës që lehtëson procesin e hapjes së negociatave.
“Midis Sofjes dhe Brukselit ka shenja në rritje se Bojko Borisov duhet marrë ende në konsideratë. Ish-kryeministri bullgar mohoi të hënën zërat se ai synon të japë dorëheqjen nga drejtimi i partisë së tij Gerb (‘Qytetarët për zhvillimin evropian të Bullgarisë’). Borisov është në gjendje të shfaqet kaq i sigurt në vetvete për një sërë arsyesh. Qeveria e pasardhësit të tij Kiril Petkov u shkarkua me një votë mosbesimi të mërkurën e kaluar pas vetëm gjashtë muajsh në detyrë.
Pak më parë, Borisov kishte siguruar mbështetje të gjerë midis partnerëve të tij në familjen e partisë konservatore evropiane PPE – duke njoftuar se partia e tij ishte gati të votonte për heqjen e vetos bullgare kundër fillimit të negociatave të pranimit në BE me Maqedoninë e Veriut. Shefi i PPE-së, Manfred Ëeber e dëshmoi atë “udhëheqje mbresëlënëse”. Në fakt, Borisov u shfaq papritur si një figurë e shpresës evropiane, si zgjidhës i një problemi urgjent të BE-së”, shkruan më tej Süddeutsche Zeitung.
Sipas medias gjermane, ‘presioni moral mbi supet e lidershipit të BE-së ishte i madh: kushdo që e vendos tani Ukrainën në korsinë e shpejtë drejt Brukselit për arsye të politikës së ditës, nuk mund t’i lërë pretendentët e kahershëm në Ballkan të qëndrojnë jashtë kësaj korsie” Ndërsa shton se ‘Parisi dhe Sofja janë dy nga arsyet e shumta pse nuk është bërë përparim midis Brukselit dhe Ballkanit Perëndimor prej vitesh. Tre vjet më parë qeveria franceze vuri veton ndaj bisedimeve të anëtarësimit me kandidatët më reformues, Maqedoninë e Veriut dhe Shqipërinë dhe i gjithë rajoni është në një gjendje poshtërimi edhe sot e kësaj dite.’
Borisov qetësoi nacionalistët
“Të premten, një ditë pas rënies së qeverisë, parlamenti në Sofje në fakt votoi me shumicë votash nga partia Gerb e Borisov për heqjen e vetos ndaj Maqedonisë së Veriut. Megjithatë, ajo përmban kushte shtesë që korrespondojnë me propozimet e Presidencës franceze të Këshillit të BE-së: Për shembull, të drejtat e pakicës bullgare duhet të regjistrohen në kushtetutën e Maqedonisë së Veriut dhe BE-ja duhet të monitorojë nëse traktati i lidhur ndërmjet të dy vendeve në vitin 2017 është zbatuar.
Bullgaria vazhdon të mbajë interpretimin se nuk ka gjuhë të pavarur maqedonase. Për sa i përket politikës së jashtme, Borisov, i cili u shkarkua nga posti në vitin 2021 pas protestave masive kundër korrupsionit, tani ka arsye të ringrihet përpara partnerëve të BE-së për shkak të lëvizjes në procesin e Ballkanit Perëndimor. Dhe brenda vendit, ai ka qetësuar nacionalistët, të cilët do ta kishin cilësuar më pa si ‘tradhti kombëtare’ heqjen e pakushtëzuar të vetos së Maqedonisë së Veriut”, shkruan Süddeutsche Zeitung. Media gjermane shton se Borisov ka shpresa për të drejtuar së shpejti një koalicion qeverisës në Bullgari./m.j
