Rritja e prezencës së mafies shqiptare, dhe shtimi i dhunës dhe atentateve me bomba, ka detyruar Ekuadorin që të kërkojë ndihmë ndërkombëtare për të luftuar kartelet e drogës, të cilat sa vijnë dhe shtohen.
Ekuadori ka përjetuar dhunë në rritje, duke përfshirë bomba makinash dhe trazira në burgje, të cilat kanë rezultuar në gati 400 të vdekur në pak më shumë se një vit, raportoi France 24 më 25 maj.
“Një seri faktorësh si afërsia gjeografike me Kolumbinë, një kufi poroz, korrupsioni, aleancat e reja kriminale, kartelet meksikane, mafiozët shqiptarë, mosmarrëveshjet mbi rrugët e trafikimit dhe rritja e dhunës shpjegojnë kryesisht rritjen e vrasjeve, veçanërisht në portet e Guayaquil dhe Esmeraldas. ”, tha Renato Rivera, një studiues me Rrjetin Amerikan Latin me bazë në Kuito për Analizën e Sigurisë dhe Krimit të Organizuar, për Diálogo.
“Lufta kundër dhunës duhet të mposht mafiet ndërkombëtare që besojnë se Ekuadori është i tyre,” tha Presidenti i Ekuadorit Guillermo Lasso për CNN Español më 16 maj. “Ne do ta fitojmë këtë betejë, veçanërisht me mbështetjen e miqve të mirë.”
“Ne nuk jemi vetëm, ne kemi mbështetjen e Shteteve të Bashkuara, Mbretërisë së Bashkuar, Kolumbisë, të cilët si miq dhe vëllezër të mirë po na mbështesin në një luftë që nuk është e lehtë; ne jemi në një fazë kontrolli për të hyrë më pas në një fazë të tërheqjes për të ulur nivelin e dhunës,” shtoi Lasso.
Si të tilla, Ekuadori dhe Peruja kanë rënë dakord të rrisin bashkëpunimin në sigurinë kufitare për të forcuar luftën kundër krimit transnacional në të gjitha format e tij: trafikun e njerëzve, drogës, armëve, municioneve dhe eksplozivëve; minierat ilegale dhe kontrabanda”, tha Presidenca e Ekuadorit. Ekuadori gjithashtu merr pjesë në Fushatën Detare të Orionit për të Luftuar Trafikun e Drogës, një operacion me 40 vende të udhëhequr nga Marina Kolumbiane, abcnews.al
Sipas Rivera, kartelet meksikane Jalisco Neë Generation (CJNG) dhe Sinaloa janë lojtarët kryesorë në kontrabandën ajrore përgjatë bregdetit ekuadorian. “Aeroplanët vijnë e shkojnë nga Amerika Qendrore, shumë me flamuj meksikan; ata sjellin armë dhe para, kokainë dhe benzinë”, shtoi ai.
Gazeta ekuadoriane Primicias raportoi se banda më e madhe kriminale e Ekuadorit, Los Choneros, mbështet Frontin Oliver Sinisterra, një grup disident i Forcave të Armatosura Revolucionare të Kolumbisë (FARC) dhe Kartelin Sinaloa. Rivalët e tyre, Los Tiguerones, bashkëpunojnë me CJNG dhe Urías Rondón Mobile Column, një grup tjetër disident i FARC.
“Presioni nga kartelet meksikane për të respektuar dërgesat, i shtuar pjesëmarrjes në rritje të organizatave evropiane dhe mafiozëve shqiptarë, të cilat janë jashtëzakonisht të dhunshme, po ushtrojnë presion mbi trafikun e narkotikëve në vend,” tha Rivera.
Në vitin 2021, autoritetet ekuadoriane çmontuan më shumë se 1,350 banda, sekuestruan më shumë se 7,500 armë dhe 231 ton drogë, përfshirë kokainë dhe marihuanë. Deri në fund të majit 2022, autoritetet kishin sekuestruar 85 ton drogë, trefishi i sasisë së sekuestruar në vitin e kaluar në të njëjtën periudhë, tha Lasso përmes Twitter.
Ekuadori do të modernizojë forcat e tij të sigurisë me trajnime ndërkombëtare dhe blerjen e pajisjeve, armëve, municioneve dhe teknologjisë për të forcuar inteligjencën e zbatimit të ligjit, njoftoi Lasso në fillim të prillit.
“Përmes Ministrisë së Brendshme dhe me mbështetjen ndërkombëtare ne do të investojmë 1.2 miliardë dollarë gjatë tre viteve të ardhshme për të forcuar forcën tonë policore,” tha Lasso. Policia Kombëtare do të ketë 30 mijë efektivë të rinj me uniformë, përfundoi ai.
/e.d
