Trafiku i organeve është kryefjala e momentit në Nigeri. Guvernatori i këtij shteti, Imo Rochas Okorocha, është akuzuar se ka bashkëpunuar me Kosovën, Turqinë, Kroacinë e disa vende të tjera për trafikim të organeve të njerëzve. Një mjek praktikant i dëmtuar ka pretenduar se udhëtimet e fundit të guvernatorit Okorocha në Kosovë, Turqi, Kroaci dhe në shtete të tjera të Amerikës Latine dhe në Azi, por edhe ndërtimi i 27 spitaleve të reja në vend, janë prova që tregojnë se guvernatori është pjesë e biznesit të trafikimit të organeve në Nigeri. Mediat vendëse raportojnë se këto deklarime janë mbështetur në pretendimet se ish- Kryeministri i Kosovës, Hashim Thaçi, është në krye të trafikimit të organeve në Evropë dhe është mik me Okorocha-n.
Thuhet gjithashtu se bashkëpunëtorët e huaj të qeverive nga Turqia, Kosova, Kroacia dhe vendet e tjera kanë qenë në Nigeri për të përsosur krijimin e rrjetit. Këto pretendime kanë ardhur pas raportimeve se guvernatori i shtetit ka refuzuar të kthejë në punë 3.000 punëtorët që thuhet t’i ketë larguar nga puna. Kongresi Laburist i Nigerisë (NLC), ka thënë se i gjithë shteti i Imos do të mbyllet nëse kalon afati i ultimatumit prej 14 ditësh nga Qeveria Qendrore për të rikthyer në punë dhe për t’iu paguajë pagat e mbetura dhe benefitet e tjera punëtorëve të larguar nga puna.
Kujtojmë se në muajin mars të vitit 2012, guvernatori i shtetit Imo të Republikës Federale të Nigerisë, Owelle Anayo Rochas Okorocha pati zhvilluar një vizitë zyrtare në Kosovë, ku u prit në Qeverinë e Kosovës nga zëvendëskryeministri i parë i qeverisë së atëhershme, Behgjet Pacolli, zëvendëskryeministrja e atëhershme Mimoza Kusari Lila dhe zëvendësministri i Punëve të Jashtme i atëhershëm, Ibrahim Gashi. Ndërkohë, “The Daily Beast” riktheu në skenë çështjen e trafikimit të organeve dhe akuzave që rëndojnë ndaj ish-kryeministrit Hashim Thaçi. Gjatë qëndrimit të Thaçit në Iowa, ekipi i fushatës së republikanit Ben Carson që po synon presidencën e Shteteve të Bashkuara të Amerikës, është takuar me të.
Sipas “The Daily Beast”, në takimin mes Thaçit dhe gjeneral Bob Dees, pjesë e ekipit të Carsonit, është diskutuar për “marrëdhëniet speciale mes Republikës së Kosovës dhe Iowas”. Mirëpo, sipas “The Daily Beast”, “në komunikatën e ekipit të Ben Carsonit, është neglizhuar përmendja e Thaçit, si kreu i një grupi shqiptar që ka kontrabanduar drogë, armë dhe organe të njerëzve nëpër Evropën Lindore, sipas një hetimi të vitit 2010 i kryer nga Dick Marty, i prezantuar në Këshillin e Evropës”. “Edhe raporti i ‘The Guardian’, që e nxjerr Thaçin si kreu i një rrjeti kriminal në Kosovën e fundviteve ’90”, shton më tej gazeta. Kur është pyetur për këto që media amerikane i quan “aktivitete kriminale”, thuhet se drejtori i komunikimit i ekipit të Carsonit, Larry Ross, ka qenë konfuz.
BW
