Gazetarja Elona Gjylmi solli një rrëfim të rrallë nga brenda institucionit të të miturve në Kavajë. Drejtuesja e këtij institucioni, Marinela Alia tregoi se si e përballojnë prindërit lajmin se fëmija i tyre ka kryer një krim.
Znj. Alia theksoi rëndësinë e bashkëpunimit familjar dhe qasjes njerëzore ndaj të miturve në konflikt me ligjin.
Ajo rrëfen gjithashtu për reagimet e ndryshme të familjarëve, rolin e disiplinës dhe se si ndonjëherë prindërit e shohin burgun si një mbrojtje nga hakmarrja.
Pjesë nga biseda:
Elona Gjylmi: Prindërit si e presin faktin që fëmija e tyre ka kryer një krim, ndodhet në këtë institucion, nuk do e shohin për një kohë të caktuar?
Marinela Alia: Herën e parë prindi mundohet të justifikojë veprimin e fëmijës. Thonë që shiko se im bir, ishte rastësisht… Dhe ne i themi që në krye të herës që ne nuk jemi këtu për të gjykuar veprën penale. Ne jemi këtu për të ofruar shërbimin dhe trajtimin me të gjitha programet që institucioni i ekzekutimit të vendimeve penale mbart. Pjesa tjetër është atje jashtë, është për drejtësinë. Madje gjëja që kërkojmë gjithmonë është bashkëpunimi. Sa më pranë ti kemi familjarët aq më i frytshëm është edhe ndërveprimi me fëmijët.
Elona Gjylmi: I keni pasur pranë gjithmonë apo keni pasur edhe revolta?
Marinela Alia: Jo jo nuk ka ndodhur asnjëherë. Madje kanë qenë shumë mbështetës dhe duke parë gjithë dinamikën ditore dhe përkushtimin e këtij stafi na kanë mbështetur.
Elona Gjylmi: A ka nga ata prindër që mendojnë se më mirë fëmija të jetë në burg se sa objekt i gjakmarrjeve, hakmarrjeve ?
Marinela Alia: Po, ka të tillë që e mendojnë.
Elona Gjylmi: Sa ka qenë kohëzgjatja e të miturëve në këto ambiente?
Marinela Alia: Kodi i drejtësisë penale për të mitur nuk i dënon më tepër se 12 vite. Këtu veprat penale janë nga 7-8 vite për vrasje.
