Një 35-vjeçar sllovak ka rënë në prangat e policisë kufitare të “Tre Urave” në Përmet, pasi gjatë kontrollit i është gjetur dhe sekuestruar një pistoletë, një thikë dhe një sasi lënde narkotike e llojit kanabis sativa e ndarë në doza.
Mësohet se i riu sllovak po tentonte t’i kalonte këto sende në shtetin fqinj Greqi me automjetin e tij, por është pikasur nga efektivët, të cilët ia kanë zbuluar atij gjatë kontrollit fizik në mjet. Ai po tentonte të dilte nga kjo pikë kufitare për në shtetin fqinj.
“Përmet/PKK Tre Urat: Policia Kufitare, në bashkëpunim me Policinë vendore, masa të shtuara gjatë sezonit turistik, për parandalimin, evidentimin dhe goditjen e paligjshmërive. Finalizohet operacioni policor i koduar “Gate”, si rezultat i kontrolleve të shtuara dhe informacioneve të siguruara nga inteligjenca policore.
Sekuestrohen 1 armë zjarri pistoletë, 1 armë e ftohtë thikë dhe një sasi lënde narkotike kanabis e ndarë në doza. Arrestohet në flagrancë 35-vjeçari (shtetas sllovak) që tentoi t’i kalonte armët dhe drogën, me automjet, drejt Greqisë.
Shërbimet e Policisë Kufitare Tre Urat, Përmet, në kuadër të masave të shtuara për sezonin turistik dhe të kontrolleve të bazuara në analizën e riskut, për parandalimin dhe goditjen e krimeve ndërkufitare, në bashkëpunim me autoritetet doganore dhe Sektorin për Hetimin e Narkotikëve dhe Trafiqeve të Paligjshme në DVP Gjirokastër, kanë organizuar dhe finalizuar operacionin policor të koduar “Gate”.
Gjatë operacionit, në dalje të RSh-së, është kaluar për kontroll në vijën e dytë, automjeti që drejtohej nga shtetasi L. D., 35 vjeç, banues në Sllovaki. Gjatë kontrollit në këtë automjet dhe kontrollit fizik ndaj drejtuesit, shërbimet e Policisë Kufitare gjetën dhe sekuestruan 1 armë zjarri pistoletë, një mjet prerës thikë dhe një sasi lënde të dyshuar narkotike kanabis, të ndarë në doza.
Në vijim të veprimeve procedurale, specialistët e Seksionit për Hetimin e Trafiqeve të Paligjshme dhe Narkotikëve në DVP Gjirokastër arrestuan në flagrancë shtetasin L. D., 35 vjeç, banues në Sllovaki. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.”
Njoftimi i policisë
/f.stafa
