Gjatë 24 orëve të kaluara shërbimi policor i Maqedonisë ka lëshuar gjithsej 2.338 vërtetime për shtetas të huaj, nga të cilët 869 janë të gjinisë mashkullore, 610 të gjinisë femërore dhe 857 për fëmijët të cilët shoqërojnë bartësin e vërtetimit si dhe për dy fëmijë të cilët kanë udhëtuar pa prind. Të gjithë këto vërtetime janë lëshuar pas kërkesës së parashtruar për njohje të së drejtës për azil. Në bazë të shtetësisë, siç njoftoi Ministria e Punëve të Brendshme, kryesojnë shtetasit e Afganistanit 813, nga Siria 804, ndërsa 721 janë nga Iraku.
Në bazë të të dhënave të fundit, rezulton se në periudhën mes 19.06.2015 dhe 20.12.2015 janë lëshuar vërtetime për gjithsej 356.221 shtetas të huaj, nga të cilët 195.805 të gjinisë mashkullore, 59.123 femërore dhe 83.279 fëmijë të cilët e shoqërojnë bartësin e vërtetimit dhe 18.014 fëmijë të cilët kanë udhëtuar pa prind. Në bazë të shtetësisë, më të shumtë janë ata nga Siria, 201.506, pastaj nga Afganistani 87.399 shtetas, nga Iraku 45.875, nga Irani 6.231, etj. Rikujtojmë se pas sulmeve në Paris, Republika e Maqedonisë lejon kalimin në territorin e saj vetëm për shtetasit nga rajonet e luftës, dhe atë nga Siria, Iraku dhe Afganistani.
