Një mega-operacion, hetimet e të cilit kanë filluar që në vitin 2020 nga Shërbimi për Kontrollin e Brendshëm të Burgjeve, po zhvillohet në Elbasan, Peqin dhe në Vlorë. Nga sa mësohet deri tani janë lëshuar 25 urdhër-arreste, ku mes tyre përfshihen efektivë rendi, policë të burgjeve, biznesmenë e madje edhe të dënuar.
Burime për Report Tv, bëjnë me dije se kreu i grupit që kryente aktivitet të paligjshëm ishte shefi i Policisë së Burgut të Elbasanit, Hysni Ndreu, i cili është arrestuar nga policia. Në bashkëpunim, këta zyrtarë lejonin futjen e drogës në institucionet e vuajtjes së dënimit si dhe të lojërave të fatit e sendeve të paligjshme.
Janë edhe 11 punonjës të burgjeve të arrestuar, në IEVP Elbasan, IEV Peqin, IEVP Drenovë. Po ashtu urdhër ndalimi si pjesë e grupit është dhënë edhe për 9 të burgosur ku disa prej tyre njihen sit të burgosurit “VIP” për shkak të krimeve të bëra. Ndër emrat e ‘spikatur’ si të përfshirë në këtë mega operacion janë Arben Grori, Klajdi Gjeçi, Aleksandër Sinanaj dhe Aleksandër Llanaj.
Në pranga kanë rënë edhe disa biznesmenë, konkretisht burrë e grua të cilët operojnë më dyqan pranë burgut të Peqinit. Një pjesë prej të arrestuarve janë edhe biznesmenë nga Vlorë të cilët akuzohen për lojëra fati.
Urdhër-arrestet janë dhënë për veprat penale, shpërdorim detyre, korrupsion dhe ushtrim i ndikimit të paligjshëm. Për ekzekutimin e urdhër-arresteve janë ndërmarrë veprime të gjera në të gjithë qarkun e Elbasanit, nën drejtimin e kreut të prokurorisë Kreshnik Ajazi. Në këtë operacion po marrin pjesë Forcat e Ndërhyrjes së Shpejtë dhe Njësia Operacionale.
Sipas raportimeve, Shërbimi i Kontrollit të Brendshëm të Burgjeve si dhe Forcat Operacionale te Drejtorise së Përgjithshme të Burgjeve, ka kryer kontrolle në ambientet e brendshme në burgje deri edhe në qeli.
Ata akuzohen për futje në qeli të lëndëve narkotike, sende të ndaluara, telefona, porosi të dhëna nga burgu, trafik droge nga burgu dhe korrupsion.
Klajdi Gjeci, u kap në Tiranë për shitje narkotikësh në Maj 2020.
Aleksandër Sinanaj dyshohet si një nga grabitësit e maskuar të një banke që ndodhet në lagjen “Hajro Çakërri” në qytetin e Vlorës, një ngjarje që ndodhi në 15.08.2011.
Aleksandër Llanaj është shpallur fajtor për vrasjen e tre të rinjve në prill të viti 2015 në Vlorë e dhe është dënuar me burgim të përjetshëm e më pas me 35 vite burgim nga të tre shkallët e gjyqësorit në Shqipëri.
Arben Grori, është dënuar me burgim të përjetshëm në vitin 1999 nga Gjykata e Pestë Penale e Milanos në Itali, vendim që u njoh dhe u la në fuqi më pas dhe nga Gjykata e apelit, po në Milano. Grori u gjet fajtor për vrasjen e Zyberit, në një spital në Milano, ku ndodhej i shtruar.
g.kosovari
