Mbrojti vjehrrin e Bashës kundër qeverisë, Avokatja e Popullit: U ndjeva mirë për fitoren!

Avokatja e Popullit Erinda Ballanca, e zgjedhur nga opozita në këtë detyrë pas marrëveshjes së 18 majit mes kreut të PD-së Lulzim Basha dhe kryeministrit Edi Rama ka pranuar për herë të parë publikisht se ka qenë në mbrojtje të vjehrrit të Lulzim Bashës në Strasburg, duke iu referuar mbrojtjes për pallatin e prishur në Vlorë nga qeveria Rama.

Ai deklaroi për news24, se është ndjerë mirë për fitoren ndaj shtetit shqiptar, por shprehu keqardhje se nuk mundi ta bente dot kauzë.

“Momenti më i vështirë dhe më i mirë kanë qenë në të njëjtën ditë. Nuk është fakt i paditur që kam qenë e përfshirë edhe personalisht në një rast kundër qeverisë. Një rast se si shteti nuk duhet të sillet ndaj qytetarëve. U ndjeva mirë ditën kur mora vendimin e gjyqit.

Ishte një fitore e madhe, sigurisht jo vetëm e imja. Por u ndjeva edhe shumë keq, sepse për shkak se unë isha pjesë e atij gjyqi nuk mund ta bëja kauzë për shkak të detyrës sime.

Nuk mund ta trumbetoja.

Nuk e bëja dot kauzë sepse do mendohej se e bëra për shkak të një axhende personale.

Mu desh të zgjidhja rrugën e Avokates së Popullit. Do doja të ishte kalë beteje për promovimin e të drejtave të qytetarëve të shpronësuar”, deklaroi Avokatja e Popullit.

Ballanca pranoi se ka paragjykime për faktin se është zgjedhur nga opozita por se është detyra e saj të ndryshojë këtë opinion dhe se duhet të jetë standard që secili të shohë punën si individuale.

“Më takon mua të ndryshoj këtë opinion. Në frymën e debatit politik në Shqipëri është shumë e thjeshtë që njerëzit të vendosen në llogore dhe të mos i njohin tjetrit asgjë e bërë mirë. Pavarësisht se jam zgjedhur nga opozita, unë gjykoj se duhet të jetë standard që secili ta shohë punën time si individuale.

Si Avokate e Popullit eksperienca ka qenë pozitive. Ka pasur një ndryshim të qenësishëm në natyrën e punës sime. Nuk kam drejtuar 50 vetë, është sfidë më vete”, tha Ballanca.

a.ç