Në sallën e Pallatit të Kongreseve po mbahet mbrëmja e fundit e Samitit të Diasporës, ku po shpërndahen çmimet “Shqiponja e Artë”. Të pranishëm janë të gjithë të 1 mijë shqiptarët e diasporës, si dhe përfaqësuesit e politikës shqiptare.
I pranishëm në mbrëmje, Ilir Meta u shpreh se është koha për të shprehur një detyrim ndaj shqiptarëve që jetojnë jashtë.
“Ndaj ne duhet të pohojmë me zë të lartë sot që jemi krenarë për ju dhe përfaqësimin tuaj të denjë në botë. Pikërisht për këtë besoj se është çasti për të shprehur një detyrim të madh ndaj jush. Asnjëherë nuk është vonë për të kuvenduar, ashtu si ju keni bërë këto ditë. Asnjëherë ne në Shqipëri nuk duhet të harrojmë se ju keni në çdo çast nevojë të ndjeni pranë jush shtetin dhe vendim amë. Ashtu si trungu i një peme ka nevojë për degët e tij, sado larg apo e vogël është ajo ashtu edhe çdo degë e tij ndjen nevojën e mbështetjes në një trung të fortë dhe të shëndetshëm. Kjo është edhe një marrëdhënie jetësore mes diasporës dhe shtetit tonë”.- tha Meta.
Samiti i Diasporës shqiptare nisi të premten dhe përfundon këtë të dielë. Samiti i Diasporës ishte i pari i llojit të tij dhe kryeministri Edi Rama është shprehur së bashku me Presidentin Thaçi, se një samit i tillë do të organizohet çdo vit.
